Sý doby: Qazaqstandyq jigitter Azııa chempıonatynyń jartylaı fınalyna shyqty
ASTANA. KAZINFORM - Qytaıdyń Chjaotsın qalasynda erler men áıelder arasynda vaterpoldan Azııa chempıonaty ótip jatyr. Atalǵan dodada Qazaqstan erler quramasy jartylaı fınalǵa shyqty.

Búgin otandastarymyz jarystyń shırek fınalynda Ońtústik Koreıany 22:9 esebimen oısyrata jeńip, jartylaı fınalǵa shyqty.
Endi, 1/2 fınalda bizdiń vaterpolshylar Japonııa men Gonkong komandalary arasyndaǵy oıynnyń jeńimpazymen kezdesedi.
Esterińizge sala ketsek, osyǵan deıin Qazaqstan áıelder quramasy týrnır qojaıyndarymen kezdesip, 6:21 esebimen oısyraı jeńilip qalǵanyn jazǵan bolatynbyz.
Sondaı-aq, búgin Bolgarııa astanasynda ótip jatqan bokstan halyqaralyq «Strandja kýboginda» Qazaqstan erler quramasynan jartylaı fınalǵa 18 boksshy shyqqan bolatyn.
Strandja týrnırindegi erler arasyndaǵy jartylaı fınal 1 naýryzǵa josparlanǵan. Al áıelder arasynda aqtyq synǵa ótken sportshylardyń esimi búgin, ıaǵnı 28 aqpan kúni belgili bolady. Bul synda Qazaqstannyń 14 burymdy boksshysy bar.