Sý dıplomatııasy departamentiniń dırektory taǵaıyndaldy
ASTANA. KAZINFORM – Danııar Shárip Sý resýrstary jáne ırrıgatsııa mınıstrliginiń Sý dıplomatııasy departamentiniń dırektory bolyp taǵaıyndaldy.
Sý resýrstary jáne ırrıgatsııa mınıstrliginde Sý dıplomatııasy departamenti quryldy. Jańa departamenttiń dırektory bolyp Shárip Danııar Esenuly taǵaıyndaldy.
Jańa qurylymdyq bólimshe Qazaqstannyń sý dıplomatııasy salasyndaǵy jumysyn júıeli ári dáıekti túrde júrgizýdi qamtamasyz etýge baǵyttalǵan. Departament transshekaralyq sý nysandary boıynsha turaqty jumys isteıtin memleketaralyq komıssııalardaǵy elimizdiń qyzmetin úılestirip, seriktes memlekettermen júrgiziletin kelissózderdi súıemeldeıdi. Sonymen qatar sý salasyndaǵy memleketaralyq kelisimderdi ázirleý jáne iske asyrý jumystarymen aınalysady.
Danııar Esenuly Shárip 1992 jyly Almaty oblysynda dúnıege kelgen. Ál-Farabı atyndaǵy Qazaq ulttyq ýnıversıtetin «Gıdrologııa» mamandyǵy boıynsha, sondaı-aq Kaspıı qoǵamdyq ýnıversıtetin «Quqyqtaný» mamandyǵy boıynsha támamdaǵan.
Eńbek jolyn 2015 jyly Aýyl sharýashylyǵy mınıstrligi Sý resýrstary komıtetiniń Sý sharýashylyǵy qurylystaryn paıdalaný jáne damytý basqarmasynda sarapshy mindetin atqarýshy retinde bastaǵan. Keıin sarapshy jáne bas sarapshy qyzmetterin atqardy.
2019 jyly Aýyl sharýashylyǵy mınıstrliginiń Transshekaralyq ózender departamenti Transshekaralyq ózender basqarmasynyń bas sarapshysy boldy.
2019-2023 jyldary Ekologııa, geologııa jáne tabıǵı resýrstar mınıstrliginiń Transshekaralyq ózender departamentinde bas sarapshy, keıin Transshekaralyq ózender basqarmasynyń basshysy qyzmetterin atqardy.
2023-2024 jyldary Qazaqstan Respýblıkasy Úkimeti Apparatynyń bas ınspektory boldy.
2024 jyldan búginge deıin Sý resýrstary jáne ırrıgatsııa mınıstrliginiń Halyqaralyq yntymaqtastyq departamenti dırektorynyń orynbasary, keıin osy departamenttiń dırektory qyzmetin atqardy.
