Sý dıplomatııasy Aral teńizin toltyrýǵa kómektesti – mınıstr
ASTANA. KAZINFORM – Soltústik Aral teńizin saqtaý jobasynyń ekinshi kezeńi ázirlenip jatyr. Onda Kókaral bógetin qaıta qurý jáne teńiz deńgeıin Baltyq júıesi boıynsha 44 metrge deıin kóterý kózdelgen. Bul týraly Sý resýrstary jáne ırrıgatsııa mınıstri Nurjan Nurjigitov Úkimette baıandady.
Ulttyq quryltaıda Memleket basshysy Soltústik Aral teńizin saqtaý jáne gıdroenergetıka áleýetin paıdalaný máselesin kótergen edi.
– Aral teńizin saqtaý máselesi memlekettik sý saıasatynyń basym mindetteriniń biri bolyp qala beredi. Byltyr Ózbekstan Respýblıkasymen transshekaralyq sý obektilerin birlesip basqarý jáne utymdy paıdalaný týraly kelisimge qol qoıyldy. Bul kelisim – on jyldyq kelissózderdiń nátıjesi. Osylaısha, Qazaqstan kórshiles memleketterdiń barlyǵymen transshekaralyq sý máselesi boıynsha quqyqtyq baza qalyptastyrýdy aıaqtady. Osy quqyqtyq negizde ekijaqty komıssııalar qurylyp, turaqty ózara is-qımyl men úılestirý qamtamasyz etiledi, – dedi mınıstr Úkimettiń búgingi otyrysynda.
Dál osy sý dıplomatııasy men Syrdarııa ózenindegi sý qoımalarynyń kelisilgen jumys rejıminiń arqasynda sońǵy sý az jyldary da Soltústik Aral teńizine turaqty sý kelip otyrǵan.
Nátıjesinde Soltústik Araldyń kólemi 2023 jyldyń basyndaǵy 18,4 mlrd tekshe metrden qazirgi 23 mlrd tekshe metrge deıin ulǵaıdy.
– Soltústik Aral teńizin saqtaý jobasynyń ekinshi kezeńin ázirleý aıaqtalyp qaldy. Bul Kókaral bógetin qaıta qurýdy jáne teńiz deńgeıin Baltyq júıesi boıynsha 44 metrge deıin kóterýdi kózdeıdi. Nátıjesinde Soltústik Araldyń aýdany 3 913 sharshy shaqyrymǵa, al kólemi 34 mlrd tekshe metrge deıin artady. Teńizdi osy belgilerge deıin toltyrý úshin 4-5 jyl qajet, – dedi N. Nurjigitov.
Budan basqa, mınıstrlik Aral-Syrdarııa basseıninde Túrkistan jáne Qyzylorda oblystaryndaǵy sýarý júıelerin jańǵyrtý jáne avtomattandyrý boıynsha 167 jobalyq-smetalyq qujattamany ázirlep jatyr.
Sonymen birge, óńirde sý únemdeý tehnologııalary belsendi engizilip keledi. Sońǵy jyldary Túrkistan jáne Qyzylorda oblystarynda 143,1 myń gektar jerge engizildi, bul shamamen 500 mln tekshe metr sý únemdeýge kómektesken.
– Qazir Kókaral bógeti men Aral basseıniniń búkil sý sharýashylyǵy sektorynyń jobalaryn júzege asyrý úshin halyqaralyq qarjy uıymdarymen kelissózder júrgizilip jatyr. Bıyl jyl sońyna deıin is-sharalardy júzege asyrýǵa qarjy tartý josparlanǵan, – dedi sala mınıstri.
Keshe Memleket basshysy Qasym-Jomart Toqaev Ulttyq quryltaıdyń V otyrysynda Kishi Aral sýynyń kólemin aıtarlyqtaı kóbeıtýge múmkindik bolatynyn aıtqan edi.