Sý deńgeıiniń kóterilýine baılanysty Ertiske batqan adamdy izdeý ýaqytsha toqtatyldy
PAVLODAR. KAZINFORM — Qutqarýshylar Pavlodar oblysy Tereńkól aýdany aýmaǵynda Ertis ózenine batyp ketken er azamattyń denesin 10 kún boıy úzbeı izdegen.
Óńirlik tótenshe jaǵdaılar departamentiniń habarlaýynsha, Ertiske sý jiberilýine baılanysty qazir ózenniń deńgeıi tym kóterilip ketken. Soǵan baılanysty izdeý-qutqarý jumystary ýaqytsha toqtatyldy.
— Belsendi izdestirý jumystary 10 kún boıy Tereńkól aýdanynyń Beregovoe aýylynda eki baǵytta júrgizildi. Qutqarýshylar eholottardy paıdalana otyryp, Ertis ózeniniń túbine tekserý júrgizdi. Uzyndyǵy shamamen 240 km bolatyn jaǵalaý (119,5 km aǵys boıynsha joǵary, 119,5 km aǵys boıynsha tómen) aýmaqtary tekserildi. Tekserý kezinde araldarǵa, taıaz jerlerge, shógindilerge, sýǵa qulaǵan aǵashtarǵa erekshe nazar aýdaryldy. 43 súńgýirlik jumystar júrgizildi, onyń barysynda 3 800 sharshy metrden astam aýmaq zertteldi. Abaı oblysynyń qutqarýshylary jumyldyryldy. Іzdeý jumystaryna tabıǵat qorǵaý maqsatynda jiberilip jatqan sýdan ózen deńgeıiniń kóterilýi, sýdyń laılanyp ketýi kedergi keltirip otyr. Soǵan oraı izdeýdi ýaqytsha doǵardyq, - dep málimdedi departamentten.
Eske sala keteıik, Ertis ózeninde er adam barjadan sekirip, sýǵa batyp ketti.