Sý daýy soǵysqa ulasýy múmkin: Pákistan Úndistanǵa talap qoıdy

ISLAMABAD. KAZINFORM – Pákistan bıligi Úndistan Inda ózeniniń aǵysyn toqtatý nemese basqa jaqqa burýǵa tyryssa, bul áreket soǵys aktisi retinde qabyldanatynyn málimdedi. Bul týraly Pákistannyń premer-mınıstri Shahbaz Sharıftiń tóraǵalyǵymen ótken Ulttyq qaýipsizdik keńesiniń otyrysynda aıtyldy, dep jazady Anadoly.

Islamabad Úndistannyń Inda sýy týraly kelisimdi birjaqty toqtatýyn synǵa aldy. Pákistan eki el arasynda 1960 jyly jasalǵan bul kelisimdi aımaqtyń beıbitshiligi úshin mańyzdy dep sanaıdy jáne óz quqyǵyn qorǵaıtynyn jetkizdi.

– Pákistanǵa tıesili sýdy toqtatý nemese burý – soǵysqa teń áreket, - delingen resmı málimdemede.

Sonymen qatar Pákistan 30 sáýirden bastap Islamabadtaǵy úndilik dıplomattar sanyn 30 adammen shektemek. Úndistanǵa tıesili barlyq ushaqtarǵa áýe keńistigin jabady. Eki el arasyndaǵy saýda da tolyq toqtaıdy. «Vagah» shekara beketi jabylady.

Djammý men Kashmırdegi terakt

Buǵan deıin Úndistannyń Djammý men Kashmır aımaǵynda týrısterge qarýly shabýyl jasalyp, 26 adam qaza tapqanyn jazdyq.

Kóptegen adam jaralandy. Shabýyldy «Qarsylyq maıdany» atty top óz moınyna aldy. Bul top Pákistanda tyıym salynǵan «Lashkar-ı-Taııba» uıymyna qatysy bar. Osy oqıǵadan keıin Úndistan Pákistanmen sý týraly kelisimdi toqtatyp, Nıý-Delıdegi pákistandyq keńesshilerdiń elden ketýin talap etti. Sondaı-aq pákistandyqtarǵa berilgen vızalar da joıyldy.

Aıta keteıik, Aqorda Memleket basshysynyń Úndistannyń Premer-mınıstrine kóńil aıtqanyn habarlady.

BUU Bas hatshysy Úndistandaǵy qarýly shabýyldy qatań aıyptady. 

Úndistan basqaratyn Kashmırdegi tanymal týrıstik ortalyqta qarýly adamdar toby 26 adamdy óltirgennen keıin Úndistan Pákistanǵa qarsy sharalardy jarııalady.

Djammý men Kashmır polıtsııasy Pahalgamda shabýyl jasaǵandardyń aty-jónin áshkerelep, olar týraly aqparat bergenderge syılyq jarııalady.