Sý bolmasa, qant qyzylshasy alqabyn keńeıtýdiń mańyzy joq - Aıjan Abaqanqyzy

ASTANA. QazAqparat – Almaty oblysyndaǵy qant qyzylshasyn egetin alqaptarda sý óte tapshy. OKQ-de ótken brıfıngide «Qazaqstan qant, tamaq jáne qaıta óńdeý ónerkásibi qaýymdastyǵy» zańdy tulǵalar birlestiginiń prezıdenti Aıjan Abaqanqyzy osylaı málimdedi, dep habarlaıdy QazAqparat tilshisi.

«Eger biz qant qyzylshasyn egetin alqaptardyń ınfraqurylymyna keletin bolsaq, bul jerde sýdyń jetkilikti bolýy óte mańyzdy. Sebebi, bul elimizdiń ońtústik aımaqtary úshin asa kúrdeli másele ekeni belgili. Jambyl oblysynda sýǵa qatysty másele turaqty bolsa, Almaty oblysynda sý óte tapshy. Eger sý bolmasa, onda tıisinshe ónim de bolmaıdy. Onda egis alqabyn da keńeıtýdiń mańyzy joq», - dedi Aıjan Abaqanqyzy.

Sonymen qatar, ol zaýyttarǵa gaz jetkizý máselesin kóterdi. Aıtýynsha, gaz jelileri qant óńdeıtin kásiporyndarǵa deıin jetkizilmegen.

«Zaýyt jumys isteı bastaıtyn maýsymda oǵan mazýt qajet bolady. Al, dál osy ýaqytta mazýttyń baǵasy qymbattaıdy da, kásiporyn tıisti mejeni oryndaı almaı qalady. Bizden qant suraıdy, alaıda ony óńdeýge qajetti resýrstarmen qamtamasyz etpeıdi», - dep másele kóterdi Aıjan Abaqanqyzy.

Buǵan deıin habarlaǵanymyzdaı, elimizdegi qant shıkizaty ishki naryqtyń 10%-yn ǵana jabady.

Foto: shutterstock.com