Sý bógetterin tekserý jumystary josparǵa saı júrgizilýde - birinshi vıtse-premer
ASTANA. Sáýirdiń 27-si. QazAqparat /Gúlmıra Álıakparova/ - Sý bógetterin tekserý jumystary josparǵa saı júrgizilýde. Bul týraly jýrnalısterge bergen suhbatynda QR Premer-Mınıstriniń birinshi orynbasary Ómirzaq Shókeev málim etti.
«Jumystar josparǵa sáıkes júrgizilip jatyr. Prokýratýranyń tekserisinen keıin, barlyq materıaldy qolymyzǵa aldyq. Elde «qaraýsyz qalǵan sý nysandary» degen túsinik bolmas úshin qazir, Aýyl sharýashylyǵy mınıstrliginiń Sý resýrstary komıteti men jergilikti jerdegi ákimdikter kúsheıtilgen rejimde jumys isteýde. Barlyq nysandar memlekettiń kommýnaldyq menshigine ótkiziletin bolady. Al qaýipsizdikpen baılanysy joq nysandarda, menshik ıeleriniń jaǵdaıyna qaraıtyn bolamyz», - dep atap ótti ol.
QR Tótenshe jaǵdaılar vıtse-mınıstri Valerıı Petrovtyń aıtýynsha, qazirgi kúni respýblıkadaǵy 806 sý bógettiń 700-den astamy tekserildi. Taldaý jumystary aıaqtalý ústinde.
Onyń paıymdaýynsha, qansha sý bógeti memleketke qaıtarylyp, qanshasy jekemenshik ıeleriniń qolynda qalatyndyǵy aldaǵy bir aıdyń kóleminde belgili bolady.
