Sý basý jaǵdaıy kóktemgi egis naýqanyna kedergi jasamaıdy - QR AShM

ASTANA. QazAqparat - Birqatar óńirlerdiń aýmaǵyn sý basqanymen, onyń kóktemgi egis naýqanyna kedergisi joq. Bul týraly Astanada kóktemgi egis jumystaryna arnalǵan brıfıngte Ósimdik sharýashylyǵy ónimderin óndirý men qaıta óńdeý jáne fıtosanıtarııalyq qaýipsizdik departamentiniń dırektory Murat Ásilbekov málim etti.

«Qaraǵandy jáne soltústik óńirlerde búginde kóktemgi egis naýqany bastalǵan joq. Atap aıtqanda, bul oblystarda egis jumystary mamyrdyń ekinshi onkúndiginen bastalady. Soǵan baılanysty sý deńgeıiniń kóterilýi egistik jumystaryna esh áser etpeıdi»,- dedi ol.

Sonymen qatar Murat Ásilbekov Qaraǵandy oblysynyń negizgi astyq egetin aýdandaryn sý baspaǵandyǵyn atap ótti.