Sý basý qaýpi bar aýmaqta turyp jatqan astanalyqtardyń tizimi jasaldy
ASTANA. QazAqparat - Tasqyn sý aǵynynyń kóbeıýine baılanysty elordada gaz apparatýra zaýytynyń aýmaǵynda jáne aǵys boıynsha tómen aımaqtardy sý basý qaýpi týyndady, dep habarlady Astana ákiminiń resmı saıty .
Sý basý qaýpi paıda bolǵanyn eskere otyryp, Departament qyzmetkerleri jergilikti atqarýshy organ, jergilikti polıtsııa qyzmeti jáne ulttyq ulanmen ózara tyǵyz áreket etý arqyly sý basýy yqtımal aımaqqa jatqyzylǵan obektiler men turǵyn úılerde jadynama men habarlamalar tarata otyryp, aýla aralaý jumystaryn júrgizýde. Tıisti jumystar barysynda turyp jatqandar sany naqtylanyp, tizim jasalady.
Búgingi kúni «KJBI» s/q, memlekettik baǵdarlama boıynsha úıler salý, LPÝ, Mehtok, qarttar úıi aýdany jáne Gazmashapparatýra aýdanynda ózenniń jańa arnasynyń boıymen 10 560 metrlik qashyqtyqta jaǵa syzyǵyn bekitý jumystary júrgizildi. 20 myń qap qum ázirlenip, 3830 metrge tóseldi.
Sý tasqynynyń aldyn alýda 1110 tekshe metr ınertti materıaldar jáne 20 myń dana qap daıyndaldy. Esil ózeniniń jaǵajaıyn bekitýge barlyǵy 297 adam jáne 141 dana ınjenerlik jáne qosymsha tehnıka tartyldy.
Qaladaǵy jaǵdaı turaqty jáne baqylanýda.
