Sý basý qaýpi bar úılerdi tasqyn bolǵan saıyn kóshirip otyramyz – mınıstr

ASTANA. KAZINFORM – Tótenshe jaǵdaılar mınıstri Shyńǵys Árinov tasqyn qaýpi bar delingen 1072 eldi mekenniń keleshektegi taǵdyry týraly pikir bildirdi.

«Sizge deıingi mınıstrler Qazaqstanda 1072 eldi mekenniń tasqyn qaýpi bar aımaqta turǵanyn, olardyń kóbin kóshirý kerektigin aıtqan. Siz osy tásilden bas tartyp otyrsyz ba? Ol úılerdiń keleshektegi taǵdyry qalaı bolady?» - dep surady jýrnalıst.

Mınıstr bul másele jyl saıyn, birtindep qana sheshiletinin aıtty.

«Tasqynnan zardap shekken úıler qaıtadan burynǵy ornyna salynbaıdy. Ol telim memleket menshigine, tabıǵı qorǵaý zonasyna engiziledi. Ár tasqyn saıyn sý jaıylmasynda turǵan úıler osy tásilmen azaıa beredi degen sóz. Sondyqtan bir mezgilde kóshirý qazirgi tańda múmkin emes. Sonda tasqyn saıyn zardap shekken úıdiń ornyna basqa jerden úı salý arqyly tasqyn qaýpi bar úıler azaıady degen sóz. ıAǵnı, birtindep tasqyn bolǵan saıyn kóshirip otyramyz. Basqa qandaı amal bar?», - dedi Shyńǵys Árinov.

Sondaı-aq, ol turǵyn úıdi apattardan saqtandyrý júıesi engizilse, buǵan deıin salynyp ketken úılerge ǵana qatysy bolatynyn aıtty.

«Meniń oıymsha, bolashaqta salynatyn úılerdi jergilikti ákimdikter apat qaýpi bar jerge salýǵa ruqsat bermeıdi. Sondyqtan olardy apat qaýpinen saqtandyrý qajeti bolmaıdy. Biz ókiletin keńeıtip, komıtet deńgeıine kótergen tótenshe jaǵdaılardyń aldyn alý organy ákimdikterdiń qaýipti orynnan úı salatyn jer bermeýin qadaǵalaıtyn bolady», - dedi mınıstr.