Sý basqan úılerine oralǵan qazaqstandyqtardyń sany 35 myńnan asty
ASTANA. KAZINFORM – Sý tasqyny bolǵan óńirlerde otandastarymyz úıine qaıta oralyp jatyr. Degenmen ýaqytsha ornalasý beketterinde 8,5 myńnan astam adam qalyp otyr. Birqatar óńirdegi qazirgi jaǵdaı týraly Tótenshe jaǵdaılar mınıstrligiń resmı ókili Asqar Shárip aıtyp berdi.
«Soltústik Qazaqstan, Atyraý jáne Aqtóbe oblystarynda 6 082 turǵyn úı men 2 584 aýla aýmaǵynan sýdyń baǵyty burylyp, sý soryldy. Respýblıka boıynsha 35 122 adam óz úıine oraldy jáne 8 520 adam evakýatsııalaý pýnktterinde. Avarııalyq-qutqarý jáne sý tasqynyna qarsy jumystarǵa 25 myńnan astam adam, 3 myń tehnıka, 634 sý sorý quraly, 268 júzý quraly, 14 áýe kemesi jumyldyryldy», - dedi Asqar Shárip Ortalyq kommýnıkatsııalar qyzmeti alańynda ótken baspasóz máslıhatynda.
Aıta keteıik, TJM-dan málimdegendeı, Batys Qazaqstan oblysynda sýdyń kóterilý deńgeıi turaqtaldy.
Keshe Sý resýrstary jáne ırrıgatsııa mınıstrligi birneshe óńirdegi sý qoımalarynyń egin naýqanyna daıyndyǵy týraly habar taratqan edi.
