Sý basqan úılerdiń ótemaqysy qalaı óteledi – mınıstrlik jaýaby
ASTANA. KAZINFORM – Ónerkásip jáne qurylys mınıstrligi sý tasqynynan zardap shekkenderge turǵyn úı ótemaqysynyń naqty tetikterin belgiledi. Bul týraly mınıstrliktiń resmı ókili Merýert Ibraeva málim etti.
«Qurylys-jóndeý jumystaryn qarjylandyrýdyń tetikteri anyqtaldy. Aldymen turǵyn úı jaramsyz dep tanylǵan jaǵdaıda. Eger turǵyn úı jóndeýge jatsa, ol jumyspen merdiger kompanııa aınalysady. Sonymen qatar tótenshe jaǵdaı qaýpine baılanysty turýǵa jol bermeý týraly sheshim qabyldanǵan obektilerdiń ornyna memlekettik turǵyn úı qorynan baspana berý (ony satyp alýǵa nemese salýǵa bolady). Azamattardyń jaıly turmysy úshin jańa turǵyn úıler ınfraqurylymymen qatar salynady», - dedi Merýert Ibraeva Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, Úkimettiń qaýlysymen sý tasqyny saldarynan zardap shekken Qostanaı oblysyndaǵy Arqalyq qalasynyń turǵyndaryn baspanamen qamtamasyz etýge tótenshe rezervten 405 mln teńge bólindi.
«Arqalyq jáne oblystyń basqa da eldi mekenderinde zalal kelgen úılerdi tekserý jumystary jalǵasýda. Qajet bolǵan jaǵdaıda qosymsha qarajat bólinedi. Biz belgilengen erejelerge sáıkes Tótenshe jaǵdaılar mınıstrligi jáne basqa da tıisti organdarmen jyljymaıtyn múlik qunyn óteý boıynsha tyǵyz baılanysta jumys isteýdemiz», - deıdi ol.
