Sý basqan óńirlerge birinshi kezekte ne qajet
ASTANA. KAZINFORM – Qazir elorda aýmaǵyndaǵy birqatar nysanda sý tasqynynan zardap shekken óńirlerge gýmanıtarlyq kómek jasaý maqsatynda volonterler qyzmet etip jatyr. Birneshe kúnnen beri qala turǵyndary sý basqan eldi mekenderdiń turǵyndaryna qajet júkti jınap berýge belsendi atsalysyp jatqanyn baıqadyq.
Osy oraıda «Astana jastary» resýrstyq ortalyǵy uıymdastyrǵan qoımaǵa baryp, eriktilerdiń jumysymen tanystyq.
«Qazir elimizdiń óńirlerindegi eldi mekenderdi sý basyp, turǵyndar qıyn jaǵdaıǵa tap boldy. Sondyqtan aýyldarǵa gýmanıtarlyq kómek qajet. Kóbisiniń úıi qırap, mal-múlkinen aıyryldy. Olar jataqhanalarǵa jáne basqa da nysandarǵa kóshirildi. Ár qalada volonterlerdiń keńseleri qurylyp, olar kómekke muqtaj adamdarmen baılanys ornatyp jatyr. Máselen, Astana qalasynda áleýmettik 9 qoıma jumys istep tur. Ár qoımamen tyǵyz ózara qarym-qatynas bar, ıaǵnı bir qoımada jetkilikti júk jınalsa, biz osy zattardy jetkizip beretin júk kólikterin izdeımiz. Atap aıtqanda, qazir júk kólikteri bar adamdar bizge habarlasyp, aqysyz negizde gýmanıtarlyq júkti tasymaldap jatyr», - dedi qalalyq volonterler shtaby tóraǵasynyń orynbasary Elvıra Esmuqanova.
Onyń aıtýynsha, júk kólikteri tıelgen zattar Qostanaı jáne Aqtóbe oblystaryndaǵy shtabtarǵa jetkizilip jatyr.
«Biz naqty bir óńirde kimder júkti qabyldaýǵa jáne ony turǵyndarǵa taratýǵa jaýapty ekenin bilemiz. Olar qaı eldi mekenge naqty qandaı quraldar, ydystar, kıimder kerek ekenin bizge aldyn ala eskertedi. Biz óz kezegimizde jetispeı jatqan keıbir zattardy metsenattardyń kómegimen alyp jatyrmyz. 31 naýryzdaǵy jaǵdaı boıynsha elordadaǵy áleýemettik qoımalar arqyly 25 tonna jónelttik», - dedi volonter.
Qala turǵyndary kóbine qalyń kıim men azyq-túlikti qoımalarǵa jetkizip berip jatyr.
«Birinshi kezekte tez búline qoımaıtyn azyq-túlik kerek. Telefondar men ózge de qurylǵylardy qýattaıtyn power bank, jylytatyn qurylǵylar, sháınek sııaqty zattarǵa suranys bar. Birneshe kúnnen beri Qostanaı jáne Aqmola oblystaryna júkti jónelttik. Aldaǵy kúnderi Aqtóbe, Batys Qazaqstan oblystaryna úlken júk kólikterin jiberýdi josparlap otyrmyz», - dedi Elvıra Esmuqanova.
Qazir elorda turǵyndary óńirlerdegi jaǵdaıǵa baılanysty kómek qolyn sozyp, belsendilik tanytyp jatyr. Astanadaǵy ár qoımaǵa kúnine 500 adam telefon shalyp, qandaı zattardy jetkizip beretini jaıynda habardar etedi.
Budan bólek, qaladaǵy ál-Farabı dańǵylyndaǵy 16-shy úıdiń aýmaǵynda «Jaqsylyq jasa» eriktiler qozǵalysy da gýmanıtarlyq kómek júgin jınastyryp jatyr.
Osy uıym ókili Tatıana Brynzanyń sózine qaraǵanda, 3 kún qatarynan «Jaqsylyq jasa» eriktileri júkti Qostanaı oblysyndaǵy eldi mekenderge jiberýge kómektesken.
«Búgin Aqtóbe oblysyna baratyn júk kóligine zattardy tıep, jóneltemiz. Osy kúnderi azyq-túlik, balalar kıimi, kórpe-jastyq, kereýet jáne jyly kıimderdi jetkizip jatyrmyz. Gýmanıtarlyq júkti óńirlerde bekitilgen adamdar qarsy alyp, turǵyndarǵa taratyp jatyr. Shalǵaı jerlerge tikushaqpen tasymaldanady. Dál qazir sý basqan eldi mekenderge elektr energııasyn beretin generatorlar qajet bolyp jatyr», - dedi ol.
Aıta keteıik, 29 naýryzdan beri elordadaǵy N. Tilendıev kóshesi boıynda ornalasqan «Rahmet» saýda ortalyǵynyń alańynda Qostanaı oblysynyń óńirlerine gýmanıtarlyq júk jóneltý beketi uıymdastyrylǵan. Osy kúnderi qala turǵyndary jumystarynan suranyp, táýlik boıy zattardy jınaqtaýǵa arnaıy kelgen.
«Keshe 10-ǵa jýyq kólikke zattardy tıedik. Onyń aldynda birazyn jónelttik. Qazir qala turǵyndary kıim-keshek, kórpe, azyq-túlikti bizge tapsyryp jatyr. Qarjylaı da kómektesip jatqandar bar. Atap aıtqanda, sý basqan aýyldardyń turǵyndary qolǵap, kúrek, qap, rezeńke etik, generator sııaqty zattardy jetkizip berýdi surap jatyr. Bul júkti aqysyz jetkizip berip jatqan júrgizýshilerge alǵysymyzdy aıtamyz. Birneshe kúnnen beri saýda ortylyǵynyń alańyna júk tasymaldaýǵa daıyn kólikter kezektesip qatarǵa turyp jatyr. Qala turǵyndary qolynan kelgenshe kómekteskenin kórip otyrmyz. Suranys bolyp jatsa, aldaǵy kúnderi de osy jerden júk jóneltip turamyz», - deıdi elorda turǵyny Nursultan Ǵalymjan.
