Sý basqan óńirlerde úı salý jumystary qalaı júrip jatyr

ASTANA. KAZINFORM – Topan sý basqan birneshe óńirde jańa úıler salynyp jatyr. Tolyǵyraq Ónerkásip jáne qurylys mınıstrligi komıtet tóraǵasynyń orynbasary Ázimbek Pazylbekuly «Biz birgemiz» telemarafonynda aıtyp berdi.

«Sý tasqynynan el boıynsha 13 myńnan astam turǵyn úıge zalal keldi. Búginde 3,5 myńnan astam turǵyn úıge tehnıkalyq tekseris júrgizildi jáne jalǵasyp jatyr. Naqty esep tehnıkalyq tekseristen keıin belgili bolady. Sý basqan turǵyn úılerdiń keıbiri qaıtadan salýdy talap etse, keıbirin jóndeý kerek. Shyǵyn respýblıkalyq bıýdjet, Úkimet rezervi, qoǵamdyq qorlar jáne bıznes ókilderi bólgen qarajat esebinen óteledi», - dedi Ónerkásip jáne qurylys mınıstrligi komıtet tóraǵasynyń orynbasary Ázimbek Pazylbekuly «Habar» telearnasyna suhbat bere otyryp. 

Odan ári mınıstrlik ókili sý basqan keıbir óńirlerde jańa turǵyn úıler salýdyń bastalǵanyn aıtty. 

«Qazir Soltústik Qazaqstan oblysynda 100 turǵyn úıdiń qurylysy bastalyp ketti, ol jerde 10-nan astam merdiger mekeme jumys jasaýda. Sonymen qosa Aqtóbe oblysy Qobda aýdanynda 120-ǵa jýyq turǵyn úıdiń qurylysy bastaldy, 11 merdiger kompanııa bar. Odan bólek, Qostanaı oblysy Arqalyq qalasynda Úkimet rezervi qarajaty esebinen 31 azamatqa jańa úı kilti tabystaldy. Bul jumystar basqa da óńirlerde júrgiziledi. Ákimdiktermen birlesip daıyn jer ýchaskeleri qaralyp jatyr», - dedi ol. 

Sondaı-aq, spıker jańa úılermen qosa turmystyq eń qajetti zattardyń beriletinin málim etti.