Sý basqan óńirlerde tasqynǵa qarsy kúresken ulandyqtar áskerı bólimderge qaıtady
ASTANA. KAZINFORM — Buǵan deıin sý tasqynyna qarsy is-sharalarǵa kómektesý úshin Batys Qazaqstan jáne Soltústik Qazaqstan oblystaryna jiberilgen áskerı qyzmetshiler men tehnıkalar turaqty ornalasqan jerlerine qaıtarylady.
Atyraý, Batys Qazaqstan jáne Soltústik Qazaqstan oblystaryndaǵy jaǵdaı áli de baqylaýda. Buǵan Jaıyq jáne Esil ózenderine quıylyp jatqan sý mólsheriniń kóptigi sebep. Jaıyq ózeniniń boıyndaǵy sý tasqynynyń aldyn alý maqsatynda ulandyqtar men qutqarýshylar jaǵalaýdy nyǵaıtý jumystaryn júrgizýde.
Búginde Ulttyq ulannyń áskerı qyzmetshileri polıtsııa qyzmetkerlerimen jáne qutqarýshylarmen birlesip sý tasqyny saldaryn joıýdy jalǵastyrýda, sondaı – aq olar ınertti materıaldary bar qapshyqtardy daıyndaý, sý aıdyndarynyń jaǵalaýyn nyǵaıtý jumystary men adamdardy evakýatsııalaý is-sharalaryn júrgizýde.
Qazirgi ýaqytta Atyraý oblysynda Ulttyq ulannyń Atyraý jáne Qaraǵandy polkterinen kelgen 800-ge jýyq sarbaz qyzmet atqarýda. Sonymen birge, 5517 áskerı bóliminiń (Oral) 80 áskerı qyzmetshisi patrýldik-bekettik qyzmet atqarady. Taǵy 110-ǵa jýyq sarbaz sý tasqynyna qarsy is-sharalarda jergilikti halyqqa kómek kórsetip jatyr. Al 6506 áskerı bólimniń (Shymkent) 300 áskerı qyzmetshisi jáne 5547 áskerı bólimniń (Qyzylorda) 200 jaýyngeri Batys Qazaqstan oblysyndaǵy sý tasqynyna qarsy is-sharalarǵa aıtarlyqtaı úles qosqannan keıin turaqty ornalasý pýnktterine qaıtyp barady.
Sonymen qatar, 6655 áskerı bóliminiń (Aqtóbe) 300-ge jýyq áskerı qyzmetshisi osy óńirde patrýldik-bekettik qyzmet atqarady. Jaýyngerler kúndiz-túni sý basqan aýmaqtardy baqylaýda ustap, qaýipsizdik maqsatynda azamattardy sý basqan úılerge jibermeıdi. Áskerı qyzmetshiler tonaý áreketterin boldyrmaý úshin bar kúshin salady.
Sý tasqyny saldaryn joıýǵa Qostanaı jáne Soltústik Qazaqstan oblystarynyń qalalary men kentterinde 6697 jáne 6637 áskerı bólimderiniń áskerı qyzmetshileri belsendi qatysýda. Soltústik aımaqtarda qyzmet atqaryp jatqan ulandyqtar sany 300 adamdy quraıdy. Elordalyq jedel brıgadadan olarǵa kómekke jiberilgen 200 sarbaz Astana qalasyna qaıta kele jatyr.
Jalpy, sý basqan óńirlerde sý tasqynyna qarsy is-sharalar bastalǵannan beri tasqynnyń aldyn alý jáne onyń saldaryn joıý úshin 3000-nan astam ulandyq jumyldyryldy. Olar 120-den astam avtomobıl tehnıkasy men 6 avıatsııa tehnıkasyn paıdalandy. Nátıjesinde 1781 adam evakýatsııalandy, uzyndyǵy 105 shaqyrymnan astam jaǵalaýdy nyǵaıtý jumystary júrgizildi, 1 mıllıon 314 myń qum toly qap daıyndalyp, bógetter jasaldy, sý tasqyny bolǵan jerlerge 140 tonna gýmanıtarlyq júk jetkizildi. Sondaı-aq ulandyqtar 1400 tonna gýmmanıtarlyq júkti túsirdi.
