Sý basqan óńirlerde osy kúnderi 325 sábı dúnıege kelgen

ASTANA. KAZINFORM — Sý tasqynyna baılanysty tótenshe jaǵdaı jarııalanǵan óńirlerde 325 bala dúnıege keldi. Bul týraly Densaýlyq saqtaý mınıstrliginiń resmı ókili Áıgerim Orazalıeva aıtty.

Sý tasqynynan zardap shekken oblystardaǵy medıtsınalyq uıymdar shtattyq rejımde jumys istep tur. 

«Medıtsınalyq kómektiń barlyq túriniń qoljetimdiligin qamtamasyz etý úshin jedel medıtsınalyq kómek qyzmetteriniń, statsıonarlardyń qabyldaý pýnkteriniń jáne emhanalardyń jumysy kúsheıtildi. Arnaıy mobıldi brıgadalar quryldy. Olar qajet bolǵan jaǵdaıda ýaqytsha ornalastyrý pýnkterine barady. Júkti áıelderdiń, balalardyń jaǵdaıyna erekshe baqylaý jasalyp otyr. Dári-dármek pen medıtsınalyq buıymdardyń qory jetkilikti», — dedi resmı ókil ortalyq kommýnıkatsııalar qyzmetindegi brıfıngte. 

Áıgerim Orazalıevanyń atap ótýinshe, evakýatsııalanǵan turǵyndardyń arasynda sozylmaly aýrýy bar 7 617 adamnyń densaýlyǵy medıtsına qyzmetkerleriniń baqylaýyna alynǵan.

1 myńnan astam medıtsına qyzmetkeri, onyń ishinde 244 dáriger, sondaı-aq 80 psıholog evakýatsııa pýnkterinde medıtsınalyq jáne medıtsınalyq-psıhologııalyq táýlik boıy kómek kórsetip jatyr. 

Mańǵystaý oblysynda 12 evakopýnktte Atyraý oblysynan kelgen 1721 adam ornalastyryldy.

Soltústik Qazaqstan oblysynda Esil aýdanynyń sý basqan aımaǵynda 4 evakopýnkt ashyldy. 

Batys Qazaqstan oblysynda sý basýy múmkin aýrýhanalardan naýqastardy, medıtsınalyq jabdyqtardy evakýatsııalaý jospary jasaldy. 

«Tótenshe jaǵdaı rejımi jumys isteıtin barlyq óńirde 387 júkti áıel baqylaýda, 325 áıel bosandy. Sý tasqyny bastalǵannan beri eń kóp bala Qostanaı, Aqtóbe jáne Batys Qazaqstan oblystarynda dúnıege kelgen. Evakýatsııalyq pýnktterde 5 038 bala bar, onyń ishinde 62 bala statsıonar jaǵdaıynda kómek, al taǵy 61 bala ambýlatorııalyq em alady. Sý tasqyny bastalǵannan beri psıhologııalyq konsýltatsııa alý úshin 1 004 ótinish tústi», — dedi ol.