Sý basqan óńir turǵyndaryna salyq jeńildigi bola ma

ASTANA. KAZINFORM – Sý basqan óńirlerde salyqtyq ákimshilendirý qalaı retteledi? Bul saýalǵa Qarjy mınıstrliginiń Memlekettik kirister komıteti tóraǵasynyń orynbasary Seıiljan Ahmetov jaýap berdi.

«Ákimdikter nazaryna 2024 jylǵy 1 naýryzdan bastap 30 maýsymǵa deıingi ótelýi tıis barlyq salyq jáne bıýdjetke tólenetin basqa da mindetti tólemder, sondaı-aq áleýmettik tólemderdi keıinge (2024 jylǵy 1 shildege deıin) qaldyrý usynyldy. Ekinshiden, 2024 jylǵy 1 naýryzdan bastap 30 maýsymǵa deıingi salyq eseptiligin tapsyrý merzimi aýysty. Úshinshiden, merziminde oryndalmaǵan salyq mindettemesiniń oryndalýyn qamtamasyz etý jáne salyq bereshegin májbúrlep óndirip alý sharalaryn qabyldaý toqtatyldy», - dedi Seıiljan Ahmetov OKQ-de ótken baspasóz máslıhatynda. 

Kirister komıteti ókiliniń aıtýynsha, oryndaý merzimi 2024 jylǵy 1 naýryzdan bastap 30 maýsymǵa deıingi kezeńde bastalatyn, kameraldyq baqylaý nátıjeleri boıynsha memlekettik kirister organdary anyqtaǵan buzýshylyqtardy joıý týraly habarlamany oryndaý merzimi de uzartyldy. 

Sonymen qatar salyqtyq tekserýlerdi (keshendi, taqyryptyq, qarsy, hronometrajdyq zerttep-qaraý) ýaqytsha toqtatylady. Bul rette toqtata turý merzimi tekserý merzimine jáne talap qoıý merzimine kirmeıdi. 

«Jańa buıryqta sý tasqynynan zardap shekken adamdarǵa qatysty jańadan salyqtyq tekserýdi toqtata turý jáne taǵaıyndaý kózdelgen. Sol sııaqty merziminde oryndalmaǵan salyq mindettemeleri boıynsha 2024 jylǵy 1 naýryzdan bastap 2024 jylǵy 1 shildege deıin ósimpul eseptemeý kózdelgen», - deıdi spıker. 

Buıryq resmı jarııalanǵan kúni qoldanysqa engiziledi jáne 2024 jylǵy 1 naýryzdan bastap týyndaǵan quqyqtyq qatynastarǵa qoldanylady.