Sý basqan óńir turǵyndary JOO jataqhanalaryna ornalastyrylýda

ASTANA. KAZINFORM – Sý basqan óńir turǵyndary joǵary oqý oryndarynyń jataqhanalaryna ornalastyrylyp jatyr. Bul týraly Ǵylym jáne joǵary bilim vıtse-mınıstri Talǵat Eshenqulov aıtty.

«Óńirlerde zardap shekkenderdi joǵary oqý oryndarynyń jataqhanalaryna ornalastyrý boıynsha da jumys júrgizilip jatyr. Búgingi kúni joǵary oqý oryndary óz jataqhanalarynan evakýatsııalanǵan adamdar úshin 1 160 oryn berý úshin ázirlep qoıǵan. Sonymen Rýdnyı jáne Jáńgir han ýnıversıtetterinde 200 oryn daıyndaldy. Qazirgi ýaqytta Rýdnyı ındýstrıaldyq ýnıversıtetine Pertsovka aýylynyń 3 turǵyny qonystandy. Jabdyqtalǵan 4 aýdıtorııa daıyndaldy», - dedi vıtse-mınıstr Ortalyq kommýnıkatsııalar qyzmetindegi brıfıngte. 

Onyń aıtýynsha, Dosmuhamedov ýnıversıteti jataqhanalardan 860 oryn ázirlep qoıǵan. Qazir onda 4 adamnan turatyn 1 otbasy ǵana ornalasqan. Esenov ýnıversıteti zardap shekkender úshin 300 oryn ázirledi. Qazirgi tańda onda 138 adam ornalasqan. M. Ótemisov atyndaǵy Batys Qazaqstan ýnıversıteti 300 oryndyq 1 jataqhanany tolyq bosatyp bergen. Qazir onda adamdar tolyq ornalasyp úlgerdi. 

«Pedagogıka jáne psıhologııa, óner, beıneleý óneri sııaqty kafedralardyń oqytýshylary men magıstranttary zardap shekken otbasylarǵa, olardyń balalaryna psıhologııalyq kómek kórsetý jumystaryn atqarýda. Mysaly, Jubanov ýnıversıtetiniń kásibı-shyǵarmashylyq fakýltetiniń 50 sýretshisi men 12 oqytýshysy balalarǵa art-terapııa jáne sýret salý boıynsha sheberlik synyptaryn ótkizdi. Qazirgi ýaqytta jedel shtabtyń jumys jospary ázirlengen. Sonymen qatar mınıstrlik joǵary oqý oryndarymen birlesip zardap shekken halyqqa kómek kórsetý boıynsha jumystardy jasaýda», - dedi Talǵat Eshenqulov.