Sý basqan oblystardaǵy jumystarǵa Ulttyq ulannyń 3000 jaýyngeri jumyldyryldy
ASTANA. KAZINFORM - Qazaqstannyń sý basqan oblystaryndaǵy sý tasqynyna qarsy is-sharalarǵa 3000 ulandyq jaýynger qatysyp jatyr, dep habarlaıdy QR Ulttyq ulanynyń baspasóz qyzmeti.
Halyq pen Ulttyq ulan birge: Ulttyq ulannyń 3000 jaýyngeri eldi mekenderdegi ózen jaǵalaryn nyǵaıtýǵa jáne patrýldeý jumystaryna kómek kórsetedi.
El Prezıdenti sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtabtyń otyrysyn ótkizdi. Otyrysty ashqan Qasym-Jomart Toqaev qazirgi ýaqytta Aqmola, Atyraý, Shyǵys Qazaqstan, Batys Qazaqstan jáne Soltústik Qazaqstan oblystarynda sý tasqynynyń ekinshi tolqyny bolýy múmkin ekenin atap ótti.
Sý tasqynyna qarsy is-sharalardy tolyqqandy júrgizý jáne qıratýdy boldyrmaý úshin QR Ulttyq ulany akademııasynyń 400 kýrsanty jáne "Ortalyq" óńirlik qolbasshylyǵynyń 6637 áskerı bóliminiń 120 sarbazy tartyldy. Olar Kojevnyı, Olshanka, Jylyjaı jáne Beskól kentterinde ınertti materıal salynǵan qaptardy daıyndaý jáne bóget salý jumystaryna tartylady. Kýrsanttar men sarbazdar jaǵalaýdy nyǵaıtý jumystaryna belsendi atsalysyp jatyr.
5546 áskerı bóliminiń (Atyraý q.) 120 adamnan astam áskerı qyzmetshileri 10 avtotehnıka kómegimen sý tasqynyna qarsy is-sharalarǵa belsendi qatysyp jatyr. Sondaı-aq polıtsııa qyzmetkerlerimen birlesip Qulsary qalasy kóshelerinde tonaýǵa jol bermeý boıynsha qyzmet atqarady.
Oral men Aqtóbede sý tasqynyna qarsy is – sharalar men qoǵamdyq tártipti qorǵaý úshin jeke quramdy tartý jalǵasýda. 5517 jáne 6655 áskerı bólimderi tıisinshe atalǵan aımaqqa 380 jáne 400 áskerı qyzmetshini jiberdi.
Jalpy quqytyq tártip áskeriniń 2000-ǵa jýyq jaýyngeri sý basqan kentter men qalalarda patrýldeý arqyly turǵyndardyń jeke múlikterin qorǵaýdy qamtamasyz etýde, jaǵalaýdy nyǵaıtý jumystaryna qatysýda, sý tasqyny bolǵan eldi mekenderde sý burýdy jáne kanaldardy tazartýdy júzege asyrýda. Budan bólek adamdardy, janýarlardy qaýipsiz jerlerge evakýatsııalaý jumystarymen de shuǵyldanyp júr.
Eske salaıyq, qosymsha 1000 áskerı qyzmetshi sany bar jeke quramdy tasymaldaý júzege asyrylýda. Atap aıtqanda, Oral qalasyna – 6506 áskerı bólim (Shymkent q.) 300 adam jáne 5547 áskerı bólim (Qyzylorda q.) – 200 adam jiberdi. Sol sekildi 5451 (Qaraǵandy q.) áskerı bóliminiń jeke quramy 500 áskerı qyzmetshi men 18 avtokólikti temir jol arqyly Atyraý qalasyna attandyrdy. Olar 2100 shaqyrymnan astam jol júrip ótedi.
Sonymen qatar, 5573 áskerı bóliminiń jeke quramy Petropavlǵa deıingi sherýdi sátti aıaqtady jáne elordalyq Ulttyq ulannyń jedel brıgadasynyń 200 áskerı qyzmetshisi sý basqan eldi mekenderdiń kóshelerinde tonaýǵa jol bermeý úshin Soltústik Qazaqstan oblysynda qoǵamdyq tártipti qorǵaýǵa kiristi.
Sý tasqyny bastalǵannan beri Ulttyq ulannyń 120 áýe jáne avtomobıl tehnıkasy tartylǵanyn atap ótken jón. 1000-nan astam adam evakýatsııalandy, ınertti materıaldary bar 280 myń qapshyq daıyndaldy jáne tóseldi. Jalpy uzyndyǵy 10 shaqyrymnan asatyn aryqtar tazartyldy jáne 77 tonnadan astam gýmanıtarlyq kómek jetkizildi.
