Sý basqan Qulsary qalasynda 100 úıdiń qurylysy qalaı júrip jatyr
ATYRAÝ. KAZINFORM – Atyraý oblysyndaǵy Qulsary qalasynda 100 úıdiń qurylysy júrip jatyr. Bul úılerdi qyrkúıekte paıdalanýǵa tapsyrý kózdelgen.
Jylyoı aýdandyq ákimdigi baspasóz qyzmetiniń málimetine súıensek, qazir turǵyn úı qurylysyn 8 merdiger júrgizýdi qolǵa alǵan.
«Qulsary qalasynda salynyp jatqan 100 úıdiń qurylys jumystarynyń qarqyny artty. Qurylysty júrgizetin merdiiger mekemeler kóbeıdi. Qazir munda 75 úıdiń irgetasy quıylyp boldy. Al, 51 úıdiń qabyrǵasyna tas qalaý jumysy aıaqtaldy. Qabyrǵasy kóterilgen 5 úıdiń tóbe jabyndysyn jabý bastaldy. Qurylys-montajdaý jumystary bekitilgen kestege sáıkes júrip jatyr. Qurylysqa jergilikti 8 merdiger mekeme tartyldy», — dep habarlady aýdandyq ákimdiktiń baspasóz qyzmeti.
Eske sala ketelik, buǵan deıin Atyraý oblystyq qurylys basqarmasynyń bólim basshysy Darhan Tilepbergenniń málimetinshe, Qulsary qalasyndaǵy «Bolashaq» shaǵyn aýdanynda 100 turǵyn úı salý kózdelgenin aıtqan edi.
«Jańadan salynýǵa tıis 80 úı „Qazaqstan halqyna“ qory bólgen qarjyǵa salynady. Al, 20 úıdiń qurylysy jergilikti bıýdjet esebinen boı kóteredi. Qyrkúıek aıynda 100 úıdi paıdalanýǵa tapsyrý kózdelip otyr», — dedi Darhan Tilepbergen.
Al, «Qazaqstan halqyna» qorynyń baspasóz qyzmetinen málim etkendeı, Atyraý oblysynyń Qulsary qalasynda 80 turǵyn úıdiń qurylysyn júrgizýge 2 mlrd 640 mln teńge bólingen. Munda 1 úıdi salýǵa jumsalatyn qarjy 31 mln 975 myń teńgeni quraıdy.
Tıptik úlgidegi jańa úılerdiń árqaısysynyń aýdany — 100 sharshy metr. Qulsaryda jańa turǵyn úılermen birge 2 myń oryndyq Binom mektebin, 300 oryndyq balabaqsha nysanyn salý josparlanǵan. Sondaı-aq shaǵyn alleıalar salynady.
«Turǵyn úılerdiń avtorlyq dızaınyn „ETALON PROJECT GROUP“ JShS daıyndady. Bul seriktestik dızaınnyń saqtalýyna baqylaý júrgizedi. Al, tehnıkalyq qadaǵalaý „ZAF-Stroıservıs“ JShS-ǵa júktelip otyr», - dep málim etti qordyń baspasóz qyzmetinen.
