Sý basqan eldi mekenderde 405 áıel bosandy
ASTANA. KAZINFORM – Sý tasqynynan zardap shekken oblystardaǵy medıtsınalyq uıymdar shtattyq rejımde jumys isteýde.
Densaýlyq saqtaý mınıstrliginiń resmı ókili Áıgerim Orazalıevanyń aıtýynsha, medıtsınalyq kómektiń barlyq túrleriniń qoljetimdiligin qamtamasyz etý úshin jedel medıtsınalyq kómek qyzmetteriniń, statsıonarlardyń qabyldaý pýnktteriniń jumysy kúsheıtildi.
«Sý tasqyny bastalǵaly evakýatsııalyq pýnktterde barlyǵy 106 medıtsınalyq pýnkt ashyldy, onyń ishinde búginde Aqtóbe, Batys Qazaqstan, Qostanaı, Soltústik Qazaqstan, Mańǵystaý, Atyraý oblystarynyń evakýatsııalanǵan turǵyndary úshin 59 medıtsınalyq post jumys isteýde. Medıtsınalyq jáne medıtsınalyq-psıhologııalyq kómek kórsetý úshin 2100 medıtsına qyzmetkeri, onyń ishinde 299 dáriger, 90 psıholog tartyldy», - dedi Á. Orazalıeva Ortalyq kommýnıkatsııalar qyzmetinde.
Evakopýnktterde medıtsınalyq jáne medıtsınalyq-psıhologııalyq kómek kórsetýge 742 medıtsına qyzmetkeri, onyń ishinde 143 dáriger, sondaı-aq 69 psıholog tartyldy.
«Sý tasqyny bastalǵannan beri sý basqan aımaqtardan sozylmaly aýrýlary bar 1360-qa jýyq adam evakýatsııalandy. Olardyń árqaısysy medıtsına qyzmetkerleriniń baqylaýynda, dári-dármektermen qajetti kólemde qamtamasyz etilýde. Tasqynnan zardap shekken 2 myńnan astam adamǵa psıhologııalyq kómek kórsetildi. Tabıǵı apattyń barlyq kezeńinde sý basqan eldi mekenderden 422 júkti áıel evakýatsııalandy, 405 áıel aman-esen bosandy, barlyq sábıler men analar patronajdyq qyzmetterdiń qamqorlyǵynda», - dedi spıker.
