Sý basqan aımaqtarǵa mınıstrliktiń myńnan astam mamany jumyldyrdy – Nurjan Nurjigitov
ASTANA. KAZINFORM – Respýblıkanyń sý tasqyny aımaqtarynda sý resýrstary jáne ırrıgatsııa mınıstrliginiń 1000-nan astam mamany men 280-nen astam tehnıkasy jumys istep jatyr. Bul týraly Sý resýrstary jáne ırrıgatsııa mınıstri Nurjan Nurjigitov málimdedi.
Ol sondaı-aq Sý resýrstary jáne ırrıgatsııa mınıstrligi qazir jergilikti atqarýshy organdarmen birlesip, strategııalyq nysandardyń qaýipsizdigi qamtamasyz etý, sý qoımalaryna tasqyn sýyn jınaý jáne ony qaýipsiz ótkizý úshin jumys istep jatqanyn jetkizdi.
«Búginde elimizdiń ońtústigindegi sý qoımalary sýarý kezeńine daıyndalýda. Ortalyq, soltústik, batys jáne shyǵys óńirlerde tasqyn sýyn qaýipsiz ótkizý is-sharalary júrgizilip jatyr. Sý qoımalarynyń jumys kestesi týraly Tótenshe jaǵdaılar departamentteri men jergilikti ákimdikter saǵat saıyn habardar etiledi. Qazirgi kezde bul aımaqtardaǵy sý qoımalary 40%-ǵa bos jáne 22,7 tekshe shaqyrym sý qabyldaı alady. Mysaly, Aqtóbe sý qoımasyna eki táýlik ishinde (27-29 naýryz aralyǵynda) sý qoımasynyń jalpy kóleminiń 75%-nan astam nemese 200 mln tekshe metr sý tústi. Tótenshe jaǵdaıdyń aldyn alý jáne halyqty ýaqtyly evakýatsııalaý úshin sý qoımasynda eń joǵary deńgeıden 15 mıllıon tekshe metr artyq sý jınaý týraly sheshim qabyldandy. Qazirgi ýaqytta Aqtóbe sý qoımasyndaǵy sý deńgeıi turaqty. Jedel den qoıý maqsatynda biz úzdiksiz monıtorıng júrgizemiz jáne ákimdikter men TJD-ny habardar etemiz. Tobyl-Torǵaı basseıniniń (Qostanaı oblysy) iri sý qoımalary taǵy 550 mln tekshe metrden astam sý qabyldaı alady», - dedi Nurjan Nurjigitov.
Mınıstr óz kezeginde qazirgi kezde sý qoımalarynyń jumys kestesi bekitilgenin, jaýapty mekeme qyzmetkerleri atalǵan obektilerge táýlik boıy baqylaý júrgizetinin atap ótti.
«Qazirgi ýaqytta sý tasqyny aımaqtarynda mınıstrliktiń 1000-nan astam mamany men 280-nen astam tehnıka jumyldyrdy. Sý sharýashylyǵy nysandarynda táýlik boıy kezekshilik uıymdastyrylǵan. Sý tasqynyna qarsy is-sharalarǵa arnalǵan qor, sonyń ishinde qum, qıyrshyq tas, qapshyqtar jáne basqa da qajetti ınertti materıaldar daıyndaldy. Mınıstrlik janyndaǵy jedel shtab ákimdiktermen ózara tyǵyz baılanys ornatty. Respýblıkalyq menshiktegi barlyq gıdrotehnıkalyq qurylystarda tasqyn sýyn apatsyz ótkizý jóninde is-sharalar jospary men sý qoımalarynyń jumys kestesi bekitildi. Jaýapty mekeme qyzmetkerleri obektilerge táýlik boıy baqylaý júrgizedi.
Aıta ketý kerek, mınıstrlik, tótenshe jaǵdaılardyń saldaryn azaıtý úshin jumys istep turǵan 15 sý qoımasyn rekonstrýktsııalaýdy josparlap otyr. Bul sý tasqyny kezinde 75 myńnan astam halqy bar 60-tan astam aýyldyq eldimekendi sý basý qaýpiniń aldyn alýǵa múmkindik beredi. Biz sý sharýashylyǵy nysandarynyń tıisti jaı-kúıin qamtamasyz ete otyryp, erigen qar sýyn jınaýǵa, sondaı-aq ony qaýipsiz ótkizýdi qamtamasyz etý úshin bar kúsh-jigerimizdi salamyz», - dedi Sý resýrstary jáne ırrıgatsııa mınıstri Nurjan Nurjigitov.
