Sý basqan aımaqtarda azyq-túlik qory jetkilikti ma: Saýda mınıstri rıteıl-kompanııa ókilderimen júzdesti
ASTANA. KAZINFORM - Saýda jáne ıntegratsııa mınıstrimen kezdesýge respýblıkalyq mańyzy bar 20-dan astam saýda jelisi qatysty, dep habarlaıdy mınıstrliktiń baspasóz qyzmeti.
Baspasóz qyzmetiniń málimetterine qaraǵanda, Atyraý, Aqmola, Batys Qazaqstan jáne Soltústik Qazaqstan oblystaryndaǵy kúrdeli jaǵdaıǵa baılanysty SIM basshysy iri rıteıl-kompanııalaryn azyq-túlik qorynyń qoljetimdiligine kúndelikti monıtorıng júrgizýge shaqyrdy.
«Tórt aımaqqa kóbirek kóńil bólý qajet. Osy óńirlerde birinshi kezekte eń qajetti negizgi taýarlardy jetkizýdiń turaqtylyǵyn qamtamasyz etip, baǵanyń negizsiz ósýine jol bermeýimiz kerek. Qoıma qorlaryn jedel aýystyrý úshin jergilikti atqarýshy organdarmen jáne bizdiń aýmaqtyq bólimshelermen is-qımyl algorıtmi bar. Azyq-túlikpen qamtamasyz etý týraly bizge tez arada habarlaýyńyzdy suraımyz», - dedi Arman Shaqqalıev.
Ol sondaı-aq Úkimet sý tasqynynan zardap shekken saýda nysandaryna keltirilgen zııandy óteý mehanızmdi pysyqtalyp jatqanyn atap ótti. Búgingi tańda 71 osyndaı nysan bar.
Óz kezeginde sý basqan oblystarda óz saýda núkteleri bar rıteıl-kompanııalar qajetti degen azyq-túlik qory jetkilikti ekenin jáne taýarlardy úzilissiz jetkizip jatqanyn habarlady. Taýarlar qory kóbeıdi, jumys shtattyq rejımde júrip jatyr. Atyraý oblysynda azyq-túlikti relokatsııalaý shemasy jasaldy. Qajetti taýar qory Batys Qazaqstan jáne Aqmola oblystarynda da bar - munda azyq-túlik jetkizý úzdiksiz júrip jatyr.
Kezdesý qorytyndysy boıynsha mınıstr Arman Shaqqalıev kásipkerlerge rezervterdi arttyrý boıynsha qabyldanǵan jedel sharalar úshin alǵysyn bildirip, mınıstrliktiń ýaqtyly áreket etýi jáne táýekelderdi azaıtý úshin logıstıkaǵa qatysty yqtımal problemalar týraly jedel habarlaýǵa shaqyrdy.
