Sý basqan aımaqqa Shymkentten qosymsha qutqarýshylar keldi
MAQTAARAL. QazAqparat – Sý tasqyny bolǵan aımaqqa Shymkentten qosymsha qutqarýshylar keldi. Shymkent qalalyq TJD búgin Maqtaaral aýdanyna arnaıy jáne qosalqy tehnıkalar men jeke quramdy jibergen bolatyn, dep habarlaıdy QazAqparat tilshisi.
Shymkentten kelgen tótenshe jaǵdaılar qyzmetkerleri sý basqan eldimekenderde avarııalyq-qutqarý jumystaryn júrgizýge kirisip ketti. Olar kómekke jiberilgen ASO 20, ATs – 2, ÝAZ markaly 4 tehnıka, MP-100 markaly 6 motopompa tehnıkalarymen turǵyndarǵa qolǵabys etýde.
Aıta keteıik, buǵan deıin sý tasqyny bolǵan aýdanǵa Shymkent qalasynan avarııalyq-qutqarý jumystaryn júrgizýge 40 adam kelgen bolatyn. Olarǵa departament tarapynan 8 tehnıka men 1 kvadrokopter jáne 4 dana júzý quraldary men motorly jáne 3 úrmeli qaıyq berilgen.
Ekinshi eshelon esebimen joldanǵan qyzmetkerler bes kún ishinde sý basqan eldimekenderde 70-ke tarta adamdy qutqarǵan. Olardyń múlikterin qaýipsiz jerge kóshirip, evakýatsııalaý jumystaryna atsalysýda. Sondaı-aq, iri jáne usaq maldardy basqa jaıylymdarǵa tasyǵan. Al, jergilikti atqarýshy organdar tarapynan ınjenerlik jumystaryn júrgizý úshin 30 arnaıy tehnıka bólingen.
