Sý basqan aýyl turǵyndary «aralda» qalǵandaı kúı keshýde - Qaraǵandy oblysy
QARAǴANDY. QazAqparat - Qaraǵandy oblysyndaǵy Shopa ózeni arnasynan 40 santımetrge kóterilgen. Tasyǵan sý Shopa aýylyna baratyn joldy basyp qaldy. Osynyń saldarynan aýyl turǵyndary «aralda» qalǵandaı kúı keshýde, dep habarlaıdy QazAqparat tilshisi.
Olarǵa azyq-túlik tasý qıynǵa soǵýda. Sonymen qatar 17 shaqyrym qashyqtyqta ornalasqan kórshi aýyldyń mektebine qatynap oqıtyn oqýshylar birneshe kúnnen beri sabaqqa bara almaı otyr.
Aýyl mańaıyn sý alyp, jan-jaqpen baılanysy úzilgen shopalyqtardyń jaıy oblys ákiminiń apparattyq jınalysynda talqylandy. Aımaq basshysy Shet aýdanynyń ákimin «túk daıyndyqtaryń joq» dep synady.
"Bul problemany aldyn ala sheshý kerek edi. Aýdan ákimi búkil respýblıkaǵa shý kóterip, óziniń sý tasqynyna daıyn emes ekenin kórsetti", - dep málimdedi oblys ákimi Erlan Qoshanov.
Aımaq basshysy Shopa aýyly sý tasqyny qursaýynda kelesi jyly taǵy qalmas úshin aldyn alý sharalaryn jasaý kerektigin atap ótti. Shopalyqtar jergilikti bılikten sońǵy jyldary aspaly kópirdi jóndeýdi jáne joldyń astyna sý ótkizetin kanaldardy salýdy surap keledi.
Tótenshe jaǵdaılar departamentiniń málimetinshe, Shopa ózeni arnasynan 30-40 santımetrge asqan. Aýylǵa baratyn jol jabylyp, eskertý belgileri ornatylǵan. Jolǵa Shet aýdanynyń jergilikti polıtsııa qyzmeti mamandarynan jasaqtalǵan kezekshilik kúzeti qoıylǵan. Al Tótenshe jaǵdaılar qyzmetiniń málimdeýinshe, Shopa aýyly joǵaryda ornalasqandyqtan eldi mekendi jáne respýblıkalyq mańyzy bar avtokólik joldaryn sý basý qaýpi joq.
Araılym Satybaldyqyzy
