Sý basqan aýyldyń halqy rızashylyqpen shyǵaryp saldy — marapattalǵan serjant
TALDYQORǴAN. KAZINFORM — Jetisýlyq serjant Amangeldi Bazarbaev sý tasqyny kezinde sińirgen eren eńbegi úshin Memleket basshysynyń qolynan marapat aldy.
Bıyl kóktemde elimiz buryn-sońdy bolmaǵan eń joıqyn tabıǵı apat — sý tasqynyna qarsy kúresti. 10 aımaqta tótenshe jaǵdaı jarııalandy.
«Er etikpen sý keship, at aýyzdyqpen sý ishken» syn saǵat týdy. Qazaqstan halqy judyryqtaı jumylyp, birligin tanytty.
Bul is-sharalardan antyna adal áskerı qyzmetshiler de qalys qalǵan joq. Otan qorǵaýshylary bir kisideı jumylyp, tótenshe jaǵdaı jarııalanǵan aımaqtardan tabyldy.
Zardap shekken halyqpen birge birliktiń, janashyrlyqtyń jáne bir-birine degen qamqorlyqtyń jarqyn úlgisin kórsete bildi.
Sondaı el qorǵandarynyń biri 3-shi synypty serjant Amangeldi Bazarbaev Taldyqorǵan qalasyndaǵy 18404 áskerı bóliminde rota serjanty bolyp qyzmet etedi.
Jetisýlyq desanttyq-shabýyldaýshylar brıgadasynyń 200-den astam áskerı qyzmetshisi tótenshe jaǵdaı jarııalanǵan alǵashqy kúnderi Batys Qazaqstan oblysyna attandy.
Olar Oralǵa jetkesin tasqyn sý qaýpi bar aýyldarǵa bólindi. Sonyń ishinde Amangeldi de 25 sarbazy men 2 serjantyna bas bolyp, qaladan 60 shaqyrym jerdegi Rýbejka aýylyna kelip toqtady.
Bularǵa qoıylǵan tapsyrma 4 shaqyrymdyq bóget salyp, aýyldy aman alyp qalý bolatyn. Qarǵyn sýdyń qaýpi kúshti. Aýyl turǵyndary úreıli kúıge túsken. Boıda qorqynysh ta bar.
Ári sarbazdaryńa da jaýaptysyń. Áıtse de, áskerıler tótenshe jaǵdaıda júrip tapsyrmany sapaly ári ýaqtyly oryndaı aldy.
Nátıjesinde uzyndyǵy 4 shaqyrym, eni 6, bıiktigi 6 metrlik bóget aýyldy tasqyn sýdan saqtap qaldy.
Áskerılerdiń bul janqııarlyq qyzmetine Rýbejka aýylynyń turǵyndary dán rıza.
Olar óz mindetterin atqaryp, aýyldan attanarda qurmettep shyǵaryp saldy. Rızashylyǵy sheksiz.
Taldyqorǵandyq desantshylar apat aımaǵynda 22 kún bolyp, tabıǵı apatqa qarsy tura bildi.
Bári bir kisideı jumylyp, ári qaýipsizdik sharalaryn qatań saqtaǵan olar áskerı bólimge aman-esen oraldy.
Memleket basshysy jýyrda ǵana sý tasqynymen kúreske belsene atsalysqan azamattardy saltanatty túrde marapattady.
Joǵarǵy Bas qolbasshynyń qolynan memlekettik nagrada alǵan áskerı qyzmetshilerdiń qatarynda Amangeldi Bazarbaev ta bar.
— Prezıdentimizdiń qolynan «Jaýyngerlik erligi úshin» medalin alǵanda boıymdy tolqynys bıledi. Bul endi kez kelgen adamda kezdesetin jaǵdaı ǵoı. Ári úlken jaýapkershilik. Óz basym bul nagradany barlyq áskerı qyzmetshilerdiń, sarbazdarymnyń, ofıtserlerimniń, qolbasshymnyń marapaty dep qabyldaımyn. Áskerimizdi kóterý úshin eńbek ete beremin. Bizdiń kúshimiz birlikte, árdaıym elmen birgemiz, — deıdi Amangeldi Serikuly.
Amangeldi — Jetisý oblysy Eskeldi aýdany Aldabergenov aýylynyń týmasy. Bul aýyldan zamanynda 20 Sotsıalıstik Eńbek Eri men Keńes Odaǵynyń Batyry Mataı Baıysov shyqqan.
Keıipkerimiz Aqtaýdaǵy teńiz jaıaý áskerleri brıgadasynda merzimdi qyzmet ótegen eken.
2014 jyly kelisimshart boıynsha Qarýly kúshter qataryna shaqyrylyp, desanttyq-shabýyldaý áskerlerinde qyzmet ótkerip keledi.
Áskerı bólim desantshylar bólimi bolǵan soń jaýyngerlik daıyndyq pen sportqa talap kúshti ekeni beseneden belgili.
Amangeldi osy kúnge deıin parashıýttiń ár túrinen alpystan asa sekirý jasaǵan.
Onyń ishinde túngi mezgilde de sekirgen kezderi bar. Júgirýmen aınalysady. Úshsaıys, fýtbol jarystaryna qatysyp turady. 2008 jyly fýtboldan Qazaqstan chempıony atanǵan.
Amangeldiniń otbasynda úsh bala ósip keledi. Olar da el qorǵany ákesin udaıy maqtan tutady.
