Sý aıdyndarynda sońǵy eki jylda 9 qutqarý stantsııasy salyndy - TJM
ASTANA. KAZINFORM - Qazaqstanda sý aıdyndaryndaǵy qaýipsizdikti kúsheıtý jáne tótenshe jaǵdaılarǵa jedel den qoıý maqsatynda qutqarý ınfraqurylymyn damytý jumystary jalǵasyp jatyr.
Bul týraly Ortalyq kommýnıkatsııalar qyzmetinde ótken baspasóz májilisinde QR Tótenshe jaǵdaılar mınıstrligi Tótenshe jaǵdaılardyń aldyn alý komıteti tóraǵasynyń orynbasary Áset Jylqaıdarov aıtty.
– Azamattardy qutqarý boıynsha jedel áreket etý maqsatynda qutqarý bólimshelerin salý jáne olardy jaraqtandyrý jumystary qarqyndy júrip jatyr. Sońǵy eki jylda sý aıdyndarynda 9 qutqarý stantsııasy salyndy. Atap aıtsam, Shalqar, Imantaý, Býrabaı, Úlken Shabaqty, Pestroe, Alakól (2), Kólsaı kólderinde jáne Esil ózeninde jumys istep tur, - dedi spıker.
Onyń sózinshe, qutqarýshylardyń materıaldyq-tehnıkalyq bazasy kezeń-kezeńimen nyǵaıtylyp, zamanaýı júrdek katerler men arnaıy tehnıka satyp alynyp jatyr.
TJM ókilderiniń aıtýynsha, mundaı qabyldanyp jatqan sharalar sý aıdyndaryndaǵy qaýipsizdikti arttyryp, tótenshe jaǵdaılarǵa jedel áreket etýge múmkindik beredi.
Aıta ketý kerek, bıyl shomylý maýsymy bastalǵaly beri 10 adam sýǵa ketken.
