Sý aıdynda shomylǵanda qandaı erejelerdi saqtaǵan durys
QYZYLORDA. KAZINFORM — Alda jaz mezgili jaqyn tur. Ádette, turǵyndar jyldyń jyly mezgilinde sý aıdyndarynda sýǵa túsýge nıet tanytady. Degenmen keıbir jaǵdaıda qaýipsizdik erejeleriniń saqtalmaýy saldarynan mundaı jaǵdaılar orny tolmas ókinishke ulasyp jatady. Azamattar qandaı qaýipsizdik erejelerine nazar aýdarýy tıis? Osy oraıda oblystyq Tótenshe jaǵdaılar departamenti Jedel qutqarý jasaǵynyń basshysy Baqyt Embergenovti áńgimege tartqan edik.
«Negizinde sýǵa túser aldynda oǵan abaılap kirý qajet. Deneniń sýǵa beıimdelýine múmkindik berý artyq emes. Árbir azamat óziniń qaltyrap tońýyna deıin jetkizbeı, 10-15 mınýtqa deıin ǵana shomylǵany jón bolady. Aıaq-qol tartylǵan jaǵdaıda abyrjýǵa bolmaıdy. Tartylǵan jerińizdi qatty shymshyńyz nemese ózgelerdi kómekke shaqyryńyz. Júze bilmeıtin azamattar belden joǵary tereńdikke barýy ózine qaýip tóndirýi múmkin. Alkogol ónimderin ishýge jáne mas kúıinde shomylýǵa tyıym salynady. Sýda óreskel ádetterge jol bermegen durys. Deneni qyzdyrǵan kúıi jáne tamaq ishe salyp sýǵa túsýge bolmaıdy. Eger ózińizdi nashar sezinseńiz, sýǵa shomylýdy dereý toqtatǵan oryndy. Úlken tolqyndar kezinde sýǵa shomylmaǵan jón. Tanys emes oryndarda sýǵa sekirmegen durys bolady. Qaıyq, aılaq jáne basqa sý qurylysynan sýǵa súńgý ómirińizge qater tóndirýi yqtımal. Sondaı-aq, jaǵalaýdan alysqa ketýige bolmaıdy», — dedi Baqyt Embergenov.
Jasaq basshysy sýǵa shomylý úshin arnaıy ruqsat etilgen jaǵajaılar men júzý basseınderin paıdalanǵan durys ekenin aıtady. Qorshaý belgilerinen ári barmaǵan jón.
«Bastysy, tyıym salynǵan oryndarda sýǵa shomylmańyzdar, motorly qaıyqtarǵa jaqyn júzip barmańyzdar, bul ómirińizge qaýipti. Sondaı-aq, ata-analardan suraıtynymyz, balalardyń qadaǵalaýsyz shomylýyna jol bermegen durys. Oblys sý aıdyndarynda 63 sýǵa shomylýǵa qaýipti ýchaske belgilengen. Bul ýchaskilerde 310 eskertý taqtaıshasy men 68 bılbord ornatylǵan. Qazir Syrdarııa deńgeıiniń kúrt tómendep ketýi saldarynan kópshilik qaryq sııaqty sýda eshqandaı qaýip joq degen pikir aıtady. Degenmen deńgeı tómen bolǵanymen darııanyń sýy óte laı jáne aǵysy qatty. Tipti keı jerde uıyq, endi bir bóliginde oıyq jerler bar. Al sý asty laıly batpaq. Aıaǵyńyz kirip ketýi múmkin», — dedi ol.
Jyl basynan beri oblys sý aıdyndarynda 4 adam qaza tapqan. Olardyń 1-i eresek bolsa, qalǵany balalar. Al ótken 2023 jyly oblystyń sý aıdyndarynda 34 adam qaza tapty, onyń 8-i kámeletke tolmaǵandar.
Oblys aýmaǵynda ruqsat etilgen 4 jaǵajaı bar. 2023 jylǵy 13 qańtarda № 7 qaýlysyna sáıkes 4 kommýnaldyq jaǵajaı belgilendi. Olardyń qatarynda Shıeli aýdanynda «Aq orda», Syrdarııa aýdanynda «Qalǵandarııa», Qarmaqshy aýdanynda «Muratbaev» jáne Qazaly aýdanynda «Qashqan sý» oryndary bar.