Sý arnalaryn jańǵyrtý baıaý: Depýtat bıýdjet shyǵynyn tekserýdi usyndy

ASTANA. KAZINFORM – Elimizde sý sharýashylyǵy nysandaryn avtomattandyrý jumystary jospardan qalyp otyr. Qazirgi ýaqytta 5 681 nysannyń tek 208-i nemese 3,7 paıyzy ǵana avtomattandyrylǵan. Osyǵan baılanysty búgin Quryltaı otyrysynda depýtat Abbat Órisbaev Premer-Mınıstrdiń orynbasary Qanat Bozymbaevqa saýal joldady.

Túrkistan oblysynda sý arnasynan aýdandyq mańyzy bar jolǵa qaýip tónip tur
Foto: Vıdeodan skrın

Abbat Órisbaevtyń aıtýynsha, Memleket basshysy Qazaqstan halqyna Joldaýynda sý únemdeý tehnologııalaryn engizý qarqynynyń tómendigin, sýdy kóp qajet etetin aýyl sharýashylyǵy daqyldaryn ósirý tájirıbesin jáne sýdy zańsyz paıdalaný faktilerin synǵa alǵan. Osyǵan baılanysty sý resýrstarynyń biryńǵaı tsıfrlyq platformasyn qurý mindeti qoıyldy.
Depýtat sý qaýipsizdigin qamtamasyz etý úshin tsıfrlyq tehnologııalardy engizýmen qatar, memlekettik qarajatty tıimdi paıdalaný, ınfraqurylymdy sapaly jańǵyrtý jáne sý únemdeý baǵytynda naqty nátıjelerge qol jetkizý mańyzdy ekenin atap ótti.

Joǵary aýdıtorlyq palatanyń 2025 jylǵy qorytyndysyna sáıkes, elimizdegi sý sharýashylyǵy júıesinde 5 681 nysan bar. Onyń ishinde 82 sý qoımasy, 4 099 kanal, 84 gıdrotehnıkalyq qurylys jáne tik drenajdyń 1 416 uńǵymasy bar. Alaıda josparlanǵan 5 paıyzdyń ornyna nebári 208 nysan nemese jalpy sanynyń 3,7 paıyzy ǵana avtomattandyrylǵan.

Sonymen qatar sýarý kanaldaryn jańǵyrtý jospary da oryndalmaǵan. Josparlanǵan 728,4 shaqyrymnyń ornyna 496,5 shaqyrym kanal ǵana jańǵyrtylǵan. Buǵan merdigermen jasalǵan sharttyń buzylýy sebep bolǵan.

Depýtat bul jaǵdaı jobalardy josparlaý sapasyna, merdiger uıymdardy tańdaý tártibine jáne sharttyq mindettemelerdiń oryndalýyn baqylaýǵa qatysty suraqtar týyndatatynyn aıtty.

Qarjynyń tıimdi jumsalýyna qatysty da másele bar. 2025 jyly respýblıkalyq bıýdjetten 728,4 shaqyrym kanaldy jańǵyrtýǵa 3,269 mlrd teńge qarastyrylǵan. Al 2026 jyly syrtqy qaryz qarajaty esebinen 383,2 shaqyrymda jumys júrgizýge 14,9825 mlrd teńge josparlanǵan.

– Árıne, jumystardyń tehnıkalyq sıpattamalary men kólemi ártúrli bolýy múmkin. Alaıda qarjylandyrý kólemindegi mundaı eleýli aıyrmashylyq, ásirese memlekettiń syrtqy qaryzdardy qaıtarý jónindegi mindettemelerin eskersek, ashyq ári ekonomıkalyq turǵydan negizdelgen túsindirýdi talap etedi, – dedi depýtat.

Budan bólek, 2026 jyly avtomattandyrylǵan nysandar sanyn 881-ge deıin ulǵaıtý josparlanǵan. Depýtat engizilgen júıelerdiń sanyn ǵana emes, olardyń is júzindegi tıimdiligin de baǵalaý qajettigin atap ótti.

Onyń pikirinshe, sý salasyndaǵy memlekettik saıasattyń nátıjeliligi ıgerilgen qarajat kólemimen nemese jańǵyrtylǵan nysandar sanymen ǵana emes, sýdyń naqty shyǵynyn azaıtýmen, sýmen jabdyqtaý senimdiligin arttyrýmen jáne paıdalaný shyǵyndaryn tómendetýmen ólshenýge tıis.

Osyǵan baılanysty Abbat Órisbaev Úkimetke úsh usynys joldady. Birinshiden, sý sharýashylyǵyn jańǵyrtý jáne tsıfrlandyrý jobalaryna keshendi tekserý júrgizip, jumystardyń naqty oryndalýyn, bólingen qarajattyń tıimdiligin, merzimderdiń buzylý sebepterin jáne oryndaýshylardyń jaýapkershiligin baǵalaý qajet.

Ekinshiden, sý sharýashylyǵy ınfraqurylymyn jańǵyrtýǵa kózdelgen bıýdjet shyǵystary men syrtqy qaryz qarajatynyń ashyqtyǵy jáne ekonomıkalyq negizdiligi qamtamasyz etilýge tıis.

Sonymen qatar jumystardyń quny men naqty nátıjeliligin baǵalaý usynyldy.

Úshinshiden, sý únemdeý jáne sý resýrstaryn tsıfrlyq esepke alý sharalaryn kúsheıtip, sýdyń kózinen bastap túpkilikti tutynýshyǵa deıingi qozǵalysyn baqylaý, sý shyǵynyn azaıtý jáne sý sharýashylyǵy nysandaryn jańǵyrtý tıimdiliginiń ólshenetin kórsetkishterin engizý qajet.

Buǵan deıin depýtat Aıjan Naımbekova bilim berý uıymdarynyń balalardy kúndelikti tasymaldaý qaýipsizdigin qamtamasyz etýine qatysty másele kóterdi.