Sý aǵar shúmekten taza altyn saýlady
ASTANA. QazAqparat - Amerıkanyń Montana shtatyna qarasty Ýaıtholl qalasynyń turǵyndary múldem túsiniksiz bolýymen qatar tosyn syıǵa toly jaıtqa kýá boldy. Naqty aıtqanda, shúmekten sýmen qosa taza altyn quıyla bastaǵan, dep habarlady sheteldik BAQ.
Ýaıtholl turǵyny Mark Braýnnyń aıtýynsha, jubaıy Sharon ydys-aıaq jýyp jatyp, sabyn kóbigi arasynan altynnyń úlbirshegine uqsas jyltyr zattardy baıqaǵan. Osydan keıin ol joldasyna qońyraý shalyp, ekeýi sary úlbirshekterdi zerdelep qaraǵan.
«Ol sýdy aǵyzyp jibermek bolyp, tyǵyndy alǵanda jyltyraǵan usaq úlbirshekterdi kórgen», -dedi NBC telearnasyna suhbat bergen M.Braýn.
Bastapqyda olar bul tabylǵan zattyń baǵaly metall ekendigine shúbá keltirgen. Alaıda hımııalyq synama onyń taza altyn ekendigin dáleldep otyr. Sál keıinirek Braýnnyń kórshileri Pol Harper otbasy da aýyz sýdan altyn úlbirshekterin tapqandyǵy belgili boldy.
