Sý adam mıynyń jumysyn 14 paıyzǵa jaqsartady
ASTANA. 18 shilde. QazAqparat - Shyǵys London ýnıversıtetiniń qyzmetkerleri oıǵa salmaq túsiretin kúrdeli sheshimderdi shesher aldynda jarty lıtr sý ishken adamnyń mıy ony ishpegen adamǵa qaraǵanda 14% jyldam jumys isteıtinin anyqtady, dep jazady The Telegraph.
«Shólin basý úshin sý ishkenderdiń reaktsııasy jyldamyraq bolatynyn kórsetken. Mundaı nátıjeni bylaı túsindirýge bolady: adam qatty shóldegende jumysqa durys den qoıa almaıdy. Bizdiń bul zertteýimiz keńse jumysshylary úshin mańyzdy», - deıdi jumystyń avtory Kerolaın Edmons.
«Bas mıynyń 80%-y sýdan turady, sondyqtan oǵan qajetti sý kóleminiń jetkilikti ekenine kóz jetkizý óte mańyzdy», - deıdi K.Edmons.
Ǵalymdardyń osyǵan deıingi jumystary kórsetkendeı, sýdy kóp mólsherde qoldanatyn mektep oqýshylarynyń sabaqqa degen zeıini men este saqtaý qabiletteri áldeqaıda joǵary.
Ǵalymdardyń zertteýleri Frontiers in Human Neuroscience jýrnalynda jarııalanǵan.
