Stýdııa qonaqtary maǵan arnap baýyrsaq pen qazy ákeletin – Arman Dáýletııarov jańa baǵdarlamanyń júrgizýshisi boldy
Búgin Arman Dáýletııarov Jibek Joly arnasynyń keshki efırinde jańa joba týraly suhbat berdi.
«Baǵdarlamanyń júrgizýshi bolǵaly ózim úshin kóp nárse ashtym. Eń aldymen qazaqsham aıtarlyqtaı jaqsardy. Árıne, áli de úırenerim kóp. Degenmen, Qazaqstannyń mýzykalyq, oıyn-saýyq ındýstrııasy: mýzykanttar, jazýshylar, akterler, sýretshiler bizdiń stýdııanyń qonaǵy boldy. Olardyń basym kópshiligin tanymaıtyn edim. Óıtkeni men basqa memlekette ómir súrdim, Qazaqstanǵa jylyna bir ret qana keletinmin, kóp nárseni tereń túsinbedim. Al qazir jedel kýrstan ótkendeı, baǵdarlama túsirilimine asqan qyzyǵýshylyǵym oıandy jáne óz jumysymnan lázzat aldym», - deıdi A. Dáýletııarov.
Sonymen birge, ol túsirilim barysyndaǵy qyzyqty sátterdi eske aldy.
«Áriptesim Láılá Sultanqyzy maǵan kóp kómektesti, qoldaý kórsetti. Bizge kelgen barlyq qonaqtardyń maǵan úlken qurmetpen jáne ystyq yqylaspen ish tartyp qaraǵany unady. Stýdııaǵa qazaqsha et, baýyrsaq, qazy ákelgender de boldy. Meni únemi ash júretindeı oılaǵan-aý. Osyndaı qurmetti kórgende sheksiz baqytqa bólenemin. Qazaq ekenimdi, osy telearnanyń, Jańa Qazaqstannyń damýyna úles qosa alǵanymdy maqtan etemin. Dál qazir aınalysyp júrgen jumysymdy asqan súıispenshilikpen jáne Qazaqstanǵa degen mahabbatpen atqaryp júrmin», - dedi A. Dáýletııarov.
Arman Dáýletııarov buryn ekrannan tys jumys istegenin jáne Jibek Joly efırine shyǵýy úlken tosynsyı bolǵanyn aıtty.
«Kadrda ózim bolamyn degen oı da bolǵan joq. Komandanyń ekrannan tys jumys isteıtin úlken bóligine qurmetpen qaraımyn. Qudaıdy kúldirgiń kelse, oǵan josparyńdy aıt deıdi ǵoı. Men búginimmen ómir súrip jatyrmyn, meniń tájirıbem men bilimim Qazaqstanǵa, áriptesterime qajet ekenin túsinemin. Árıne, men jańa Qazaqstanǵa, jańa Qazaqstannyń qalyptasýyna paıdaly bolatyn túrli salalarda bolamyn», - dedi stýdııa qonaǵy.
