Stýdenttik jataqhanalarda 5000-nan asa oryn tapshy — mınıstr
ASTANA. KAZINFORM — Qazaqstanda 2026 jyldyń sońyna deıin shamamen 20 stýdenttik jataqhana paıdalanýǵa beriledi. Bul týraly Úkimette ótken brıfıngte Ǵylym jáne joǵary bilim mınıstri Saıasat Nurbek málim etti.
Mınıstrdiń aıtýynsha, eldegi stýdentter jataqhanasyndaǵy oryn tapshylyǵy aıtarlyqtaı qysqarǵan.
— Buryn 82 myń orynǵa deıin jetken tapshylyq búginde 5176 orynǵa deıin azaıdy. Tipti Astanada buryn 5 myń oryn jetispese, qazir ol 176 oryn ǵana. Qalǵan tapshylyq tek Almaty qalasynda qalyp otyr. Jyldyń sońyna deıin shamamen 20 stýdenttik jataqhana paıdalanýǵa beriledi, — dedi ol.
Vedomstvo málimetinshe, jataqhana tapshylyǵynyń bir bóligi memlekettik jáne jergilikti bıýdjet esebinen, sondaı-aq sýbsıdııalaý tetigi arqyly jabylǵan. Sońǵy bes jylda jeke ınvestıtsııalar esebinen shamamen 60 myń oryn ashylǵan.
Mınıstr sondaı-aq stýdentterdi jataqhanamen qamtý úshin daǵdarystyq ortalyqtar jumys isteıtinin atap ótti. Máselen, Almatydaǵy Logıstıka jáne kólik akademııasy bazasynda 55 bólmesi bar ortalyq stýdentterge kómek kórsetip keledi.
Sonymen qatar Abaı atyndaǵy Qazaq ulttyq pedagogıkalyq ýnıversıteti janynda da sıtýatsııalyq ortalyq jumys isteıdi. Onda arnaıy mamandar keńes berip, stýdentterdi bos oryndarǵa baǵyttaıdy.
— Sońǵy 3–4 jylda jataqhana máselesi boıynsha shaǵymdar azaıdy. Bul baǵyttaǵy jumys júıeli túrde jolǵa qoıyldy, — dedi mınıstr.
Onyń aıtýynsha, qazirgi talap boıynsha joǵary oqý oryndary stýdentterdiń keminde 80 paıyzyn jataqhanamen qamtamasyz etýi tıis.
Eske sala keteıik, elimizde stýdentter sany qansha ekeni belgili boldy.
