Stýdenttik jataqhanalarda oryndardyń ádil bólinýi baqylaýǵa alynady
«Bıylǵy maýsym aıynda Qoǵamdyq baqylaý kartasy» jobasy aıasynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Arnaıy monıtorıngtik toptarynyń músheleri reıdtik sharalardy ótkizdi. Onyń barysynda stýdenttik jataqhanalarda bógde adamdardyń zańsyz ornalasýy boıynsha birqatar faktiler anyqtaldy. Sonymen birge, keıbir oqý oryndarynda bos oryndardyń joqtyǵy saldarynan, stýdentter páter jaldaýǵa májbúr. Al bul páterlerdi jaldaý quny jataqhanaǵa qaraǵanda áldeqaıda joǵary», - delingen atalǵan agenttiktiń habarlamasynda.
Jańa oqý jyly qarsańynda jataqhanaǵa ornalasýǵa nıetti adamdar sany artady. Osy oraıda stýdenttik jataqhanalarǵa bóten adamdardyń ornalasýyna jol bermeý maqsatynda, sondaı-aq oryndardy bólýdiń ádil protsesin qamtamasyz etý turǵysynda Agenttik pen qoǵam belsendileri tıisti sharalardy uıymdastyrmaq.
«Arnaıy monıtorıngtik toptar men Qoǵamdyq keńes músheleri elimizdiń barlyq óńirlerinde stýdentterdiń jataqhanalarǵa ornalasýynyń protsesterine belsendi túrde qatysady. Atalǵan jumys bos oryndardyń ashyqtyǵyn arttyrýǵa múmkindik beredi», - dep atap ótilgen vedomstvo málimetinde.
Munymen qosa, qoǵam belsendileri jańa jataqhanalardyń sapasy men qurylysyn baqylaýǵa almaq.
«Stýdenttik jataqhanalardaǵy oryndar boıynsha zańsyz ári aılaly áreketter baıqalsa, onda Agenttiktiń aımaqtyq departamentterine habarlasa alasyzdar. Sáıkesinshe, tıisti sharalar qabyldanady», - dep eskertti Agenttik ókilderi.