Stýdenttik qurylys jáne Jasyl el jastar eńbek jasaqtary úshinshi eńbek maýsymyna saltanatty túrde kiristi

Stýdenttik qurylys- eńbek jasaqtarynyń komandıri Murat Kóshimbaı búgingi shara el táýelsizdiginiń 20 jyldyǵyna oraı ótkizilip otyrǵandyǵyn aıtady. «Búgingi shara eńbek jasaqtarynyń úshinshi maýsymdaǵy jumys joldarynyń bastaýy bolyp tabylady. Bıyl 1200 jasty jumyspen qamtymaqpyz. Olar ýnıversıtetterdiń jataqhanalaryn jóndeý jumystarymen ján qala mańyn tazalaýmen aınalysatyn bolady. Stýdentterdiń barlyǵyna jumys berýshiler nemese demeýshiler atynan eńbek aqy tólenedi. Jalpy, jastar arasynda jazǵy demalysta jumys istep, aqsha tapsam degen belsendilik baıqalýda», -deıdi M.Kóshimbaı.

Medeý aýdany ákiminiń orynbasary Almasbek Nókerbanuly 2001 jyly Elbasy N.Á. Nazarbaevtyń bastamasymen Stýdenttik qurylys jasaqtary óz jumystaryn qaıta jandandyrsa, 2005 jyly Jasyl el jasaqtary dúnıege kelgendigin aıtyp ótti. Sodan beri osy eki jasaq ózderiniń jumystaryn ár jylda turaqty túrde júrgizip kele jatyr. «Ótken jyly Qyzylaǵashta bolǵan tabıǵat apaty kezinde eń alǵashqy járdemshilerdiń biri bolyp osy eki jasaq qol ushyn bergen bolatyn. Bıyl da Medeý shatqaly men Іle Alataýy saıabaǵynda bolǵan tabıǵat apatynda osy jasaqtar Medeýge, Shymbulaqqa kóteriletin joldardy tazartyp, eki kún boıy talmastan eńbek etti. Bul jastardyń elge degen patrıottyq sezimderi, qurmeti dep bilemin»,-deıdi A.Nókerbanuly.

Sondaı-aq jıyn barysynda jastar án aıtyp, bı bılep óz ónerlerin ortaǵa saldy.