«Stýdenttik baspana» baǵdarlamasy aıasynda elimizde 4 jyldyń ishinde 34 ǵımarat boı kóteredi

Bul týraly búgin BNews.kz portalynda ótken on-laın konferentsııa barysynda Bilim jáne ǵylym mınıstri Baqytjan Jumaǵulov málim etti.

Táýelsizdik jyldarynda Qazaqstanda bundaı jappaı stýdenttik baspana salý qolǵa alynbaǵanyn basa aıtqan mınıstr: «QR Premer-Mınıstri maǵan «Stýdenttik baspana» memlekettik baǵdarlamasyn ázirleýdi tapsyrdy. Ol ázirlendi jáne 4 jyldyń ishinde 34 jańa stýdenttik jataqhana salý kózdelýde. Qazaqstanda bundaı jappaı qurylys salý eshqashan bolǵan emes. Olarda turý quny qazirgi qarapaıym jataqhanada turý qunymen birdeı bolady», - dedi.

B.Jumaǵulovtyń aıtýynsha, atalǵan baǵdarlamanyń basty demeýshisi qyzmetin memleket atqarady. Degenmen jeke kompanııalardy da tartý josparda bar. Qazirgi tańda mınıstrlik jeke joǵary oqý oryndary men tanymal demeýshilerdi tartý arqyly memlekettik-jeke áriptestik máselesin de qarastyrý ústinde.

Stýdenttik baspanalardyń basym bóligi Astana men Almaty qalalarynda boı kóteretin bolady. Óıtkeni bul eki qalada jataqhana máselesi óte ótkir tur.