Stýdenttermen kezdesý barysynda nashaqorlyq máselesi áńgimege arqaý boldy
ASTANA. 7 jeltoqsan. QazAqparat - Qazirgi kúni qoǵamdy tolǵandyrǵan máseleniń biri - nashaqorlyq. Nashaqorlyqtyń áleýmettik ortaǵa tıgizetin zııany orasan zor.
Esirtkige áýestenýshilerdiń kóbeıýi álem jurtshylyǵyn qatty alańdatyp otyr. Esirtkige qushtarlyq, ásirese, jastar arasynda keńinen taralýy búgingi kúnniń ózekti máselesine aınalýda. Osy qoǵamdyq derttiń aldyn alý, onyń shyrmaýyna jastardyń túsip qalmaýy úshin qazirgi kúni túrli aldyn alý sharalary keńinen qolǵa alynýda. Osy sózimizge dálel retinde, keshe, 6 jeltoqsan kúni QR ІІM Kóliktegi ІІD Esirtki bıznesine qarsy kúres bóliminiń aǵa jedel ýákili, polıtsııa kapıtany Orynbaı Dúısenbıev Astana qalasyndaǵy Kólik jáne kommýnıkatsııa kolledjiniń 4 kýrs stýdentterimen kezdesý ótkizdi, dep habarlaıdy Kóliktegi ІІD baspasóz qyzmeti.
Polıtsııa kapıtany kezdesýge qur qol kelmegen syńaıly. Ol ózimen birge ala kelgen esirtkiniń aldyn alýǵa baǵyttalǵan únparaqtar men «Narkopost», «Esirtkisiz bolashaq» jýrnaldary stýdentterdiń qyzyǵýshylyǵyn týǵyzdy.
Shara barysynda polıtsııa kapıtany stýdentterge nashaqorlyqtyń zııany, onyń adamǵa ákeler zardaby jaıly baıandap, esirtki qylmysyn jasaǵandarǵa qatysty qoldanylatyn jaza túrlerine de toqtala ketti.
Kezdesý barysynda stýdent jastarǵa esirtki, nashaqorlyq problemasyna arnalǵan beınefılmder kórsetildi. Onda burynǵy nashaqorlar, esirtki problemasymen aınalysatyn qyzmetkerler nashaqorlyq syndy qoǵamdyq derttiń zalaldaryna saraptama jasaı ketti.
Odan keıin Orynbaı Dúısenbıev stýdentterdiń san alýan suraqtaryna jaýap berdi. Stýdentter qaýymy nashaqorlyq problemasyna qatysty óz pikirlerin bildirip, mamanmen pikir almasýǵa múmkindik aldy.
