Stýdentterge zııatkerlik menshik quqyǵy jaıynda maǵlumat berildi
ASTANA. 5 qarasha. QazAqparat - Respýblıkalyq «Kontrafakt» is-sharasy sheńberinde Zııatkerlik menshik quqyǵy komıtetiniń uıymdastyrýymen keshe L.N. Gýmılev atyndaǵy Eýrazııalyq ulttyq ýnıversıtetiniń, Qazaq ulttyq óner ýnıversıtetiniń, S. Seıfýllın atyndaǵy Qazaq agrotehnıkalyq ýnıversıtetiniń stýdentterimen jáne oqytýshylarymen kezdesý ótti, dep habarlady QR Ádilet mınıstrliginiń baspasóz qyzmeti.
Jınalǵan qaýym aldynda zań ǵylymdarynyń doktory, professor, Azamattyq quqyqtyq zertteýler ınstıtýtynyń dırektory, Qazaq Gýmanıtarlyq Zań ýnıversıtetiniń azamattyq quqyq kafedrasynyń meńgerýshisi Tólesh Qaýdyrov, patenttik senimdi ókil Sholpan Kirebaeva, sondaı-aq Microsoft kompanııasynyń bilim salasyndaǵy tanylǵan seriktesi Denıs Berezın sóz sóıledi.
T. Qaýdyrov óz sózinde táýelsiz Qazaqstannyń patenttik vedomstvosynyń qalyptasý tarıhyna, zııatkerlik menshik quqyqtarynyń jalpy erejelerine, avtorlardyń, patent ıeleriniń jáne quqyq ıelenýshilerdiń quqyqtaryn qorǵaý máselelerine toqtap ótti. Zııatkerlik menshik nysandaryna qorǵaý qujattaryn alý salasyndaǵy halyqaralyq tájirıbege sholý jasady. Patent ıesine ǵana tabys ákelip qoımaı, memleket ekonomıkasynyń qarqyndy damýyna yqpal etetin, ónertabysty, ónerkásiptik úlgilerdi, paıdaly modelderdi jáne t.b. kommertsııalandyrýdyń kókeıkestigi týraly aıtyldy.
Sh.Kirebaeva patenttik quqyq tarıhy jáne adamzat tarıhynda birinshi patent alý tájirıbesi týraly aıtty. Jumys barysynda taýar tańbalary ıeleriniń quqyqtaryn tirkeý boıynsha kezdesetin mysaldar keltirdi. Sondaı-aq, noý-haý qupııalarynyń erekshelikteri týraly aıtyldy, mysaly, bárine áıgili «Koka-kola» sýsynynyń formýlasy áli kúnge deıin qupııa.
D. Berezın jınalǵandardy baǵdarlamalyq qamtamasyz etýdi zańdy paıdalaný boıynsha Maıkrosoft korporatsııasy ótkizetin is-sharalarmen tanystyrdy.
Dáriskerler kótergen máseleler stýdentterdiń de, oqytýshylardyń da qyzyǵýshylyǵyn týdyrdy. Stýdentterdiń nazary kúndelikti ómirde paıdalanylatyn zattar (mýzykalyq týyndylar, fılmder, uıaly telefon, oıynshyqtar, kıim, tehnıka, azyq-túlik jáne t.b.) zııatkerlik menshik nysandary bolyp tabylatynyna aýdaryldy.
Áıgili qazaqstandyq oryndaýshy Qydyráli Bolmanovnyń patent ıesi retindegi jańa ónerkásiptik úlgileri, sondaı-aq kontrafaktilik ónimderdi paıdalanýǵa teris kózqarasty nasıhattaıtyn beınerolık kórsetildi.
Stýdentterdiń suraqtaryna tushymdy ári tolyq jaýap qaıtaryldy.
