Stýdentterge tıesili stıpendııany kolledj basshylyǵy zańsyz ıemdengen
ASTANA. KAZINFORM — Ońtústik Qazaqstan joǵary medıtsınalyq kolledjinde bes jyl boıy stýdentterdiń stıpendııalary zańsyz jumsalǵan, dep habarlaıdy Shymkent qalasy boıynsha Іshki memlekettik aýdıt departamenti.
Qalalyq Іshki memlekettik aýdıt departamenti «Ońtústik Qazaqstan joǵary medıtsınalyq kolledji» jaýapkershiligi shekteýli seriktestiginde (budan ári — Kolledj) ishki aýdıt júrgizdi. Tekserý qorytyndysy boıynsha jalpy somasy 204,1 mln teńge kóleminde qarjylyq buzýshylyqtar anyqtaldy, olardy memlekettik bıýdjetke óteý qajet. Atalǵan somanyń ishinde aýdıt barysynda 3,0 mln teńge óndirip alyndy.
Tekserý barysynda 2021–2025 jyldary Kolledjde zańnama talaptaryn buza otyryp, bilim alýshylardyń tamaqtaný, turý jáne oqý ádebıetin satyp alý shyǵyndaryn ishinara óteýge bólingen bıýdjet qarajaty zańsyz ıelengeni anyqtaldy. Zańsyz ıemdenýdiń jalpy somasy 203,1 mln teńgeni qurap, ol 286 stýdentke qatysty boldy.
Atap aıtqanda:
-
2021 jyly — 71 stýdentke arnalǵan 11,9 mln teńge;
-
2022 jyly — 160 stýdentke arnalǵan 19,1 mln teńge;
-
2023 jyly — 235 stýdentke arnalǵan 43,8 mln teńge;
-
2024 jyly — 210 stýdentke arnalǵan 78,3 mln teńge;
-
2025 jyldyń alǵashqy alty aıynda — 206 stýdentke arnalǵan 50 mln teńge.
— Sonymen qatar, alty jaǵdaıda jalpy somasy 310,2 myń teńge mólsherinde memlekettik stıpendııalardy artyq tóleý faktileri, sondaı-aq eki jaǵdaıda 712,0 myń teńge kóleminde memlekettik bilim berý tapsyrysy boıynsha artyq aýdarymdar anyqtaldy. Aýdıt qorytyndysy boıynsha anyqtalǵan zańbuzýshylyqtardy joıý jáne osy buzýshylyqtarǵa jol bergen laýazymdy tulǵalardy jaýapkershilikke tartý máselesin qaraý jóninde nusqama berildi, — delingen habarlamada.
Budan buryn Mańǵystaýda kolledj esepshisi 243 mln teńgeni jeke shotyna aýdarǵany belgili boldy.