Stýdentterge arnalǵan jataqhanalarda tólemaqynyń ósýi sebebi belgili boldy

ASTANA. QazAqparat – Ǵylym jáne joǵary bilim mınıstrligi stýdentterge arnalǵan jataqhanalarda tólem somasynyń ósýi sebebin aıtty, dep habarlaıdy QazAqparat tilshisi.

«Bıylǵy oqý jylynda ýnıversıtet jataqhanasynda turý quny ǵımaratty kútip ustaý, qyzmet kórsetý shyǵyndaryna oraı ósti. Bul turǵyda qurylys zattary qunynyń ósimin, kúrdeli jóndeý, qyzmetkerlerdiń eńbekaqy qory, kommýnaldyq qyzmetter, deratızatsııa/dezınfektsııa jumystaryn eskerý kerek», - delingen mınıstrliktiń QazAqparat agenttigine bergen málimetinde.

Vedomstvo aqparatyna qaraǵanda, akademııalyq erkindik aıasynda JOO quzyretine oqý protsesin júzege asyrý, kadrlardy irikteý ári ornalastyrý, sondaı-aq ǵylymı, qarjylyq-sharýashylyq jáne Qazaqstan zańnamasynda belgilengen basqa da qyzmet kiredi.

Sonymen qatar, qyzmettiń ashyqtyǵy men obektıvtiligin qamtamasyz etý úshin ýnıversıtetterde korporatıvtik basqarý júıesi – Dırektorlar keńesi engizildi. Osyǵan deıin ýnıversıtet rektory jeke sheshim qabyldaý quqyǵyna ıe bolsa, endi korporatıvtik basqarý engizilgennen keıin rektor oryndaýshy bolyp sanalady, ıaǵnı strategııalyq sheshimderdi Dırektorlar keńesi qabyldaıdy. Jataqhanada turý qunyna qatysty sheshimdi de Dırektorlar keńesi qarastyrady.

Budan buryn habarlanǵandaı, bıyl Qazaqstanda stýdentterge arnalǵan 6 jataqhana salyndy.