Stýdentterdiń jekelegen sanattary úshin stıpendııaǵa ústemeaqy belgilendi
ASTANA.KAZINFORM - Memleket JOO stýdentteri úshin stıpendııany ulǵaıtý boıynsha josparly jumysty jalǵastyryp jatyr.
Ǵylym jáne joǵary bilim mınıstrligi stýdentterdiń jekelegen sanattary úshin stıpendııaǵa ústemeaqy belgilengenin málim etti.
Olarǵa mynalar quqyly:
Joǵary nemese kásiptik, orta bilimnen keıingi, joǵary oqý ornynan keıingi bilim alatyn kórý jáne estý qabileti buzylǵan adamdarǵa bakalavrıat stýdentterine – 94 651 teńge, magıstranttarǵa – 204 921 teńge, doktoranttarǵa – 459 375 teńge ústemeaqy belgilendi.
Jaralaný, kontýzııa, aýrý saldarynan múgedektigi bar nemese mertikken adamdarǵa bakalavrıat stýdentterine – 78 558 teńge, magıstranttarǵa – 175 647 teńge, ınternderge – 142 293 teńge ústemeaqy belgilendi.
Ata-anasynyń qamqorlyǵynsyz qalǵan nemese qorǵanshylyqtaǵy (qamqorshylyqtaǵy) jetim balalar qataryndaǵy adamdarǵa stıpendııa 30%-ǵa kóteriledi, ıaǵnı bakalavrıat stýdentterine – 68 083 teńge, magıstranttarǵa – 152 227 teńge, ınternderge – 123 320 teńge ústemeaqy belgilendi.
Memlekettik stıpendııadan basqa, joǵary oqý ornynyń Ǵylymı keńesiniń sheshimi boıynsha 104 744 teńge mólsherinde taǵaıyndalatyn oqýda erekshelengen stýdentterge, olımpıadalardyń, shyǵarmashylyq konkýrstardyń, sporttyq jarystardyń jeńimpazdaryna arnalǵan Prezıdenttik stıpendııa bar.
Prezıdenttik stıpendııany 3-shi oqý jylynan bastap stýdentter jáne 2-shi oqý jylynan bastap magıstranttar ala alady. Mundaı stıpendııaǵa bıýdjettik negizde oqıtyn stýdentter de, aqyly negizde oqıtyndar da quqyly.
Stýdentterge arnalǵan jańa jataqhanalar salý
2029 jylǵa deıin jataqhanalarda jyl saıyn 10 myń oryndy paıdalanýǵa berý kózdelgen.
2024 jyldyń qorytyndysy boıynsha elimizde 11 096 oryn paıdalanýǵa berildi.
Astana jáne Almaty qalalarynda jataqhanalarda oryndardy ýaqtyly alý boıynsha el stýdentterine konsýltatsııalyq qyzmetter kórsetetin jobalyq front-ofıster jumys isteıdi.
2024 jyly jataqhanalar salý boıynsha memlekettik tapsyrystyń mólsheri Almaty qalasynda 144 AEK-ten 230 AEK-ke deıin, Astana qalasyn qosa alǵanda, eldiń basqa óńirlerinde 122 AEK-ten 195 AEK-ke deıin ulǵaıtyldy.
Sondaı-aq, jataqhanaǵa obektilerdi rekonstrýktsııalaǵany úshin ótemaqy mólsheri 92 AEK-ten 182 AEK-ke deıin ulǵaıtyldy.
Qurylys salýshyǵa memleket tarapynan ınvestıtsııalyq shyǵystardy kezeń-kezeńimen óteýdi jáne kásipkerlik sýbektileriniń jataqhanalardy salýǵa jáne rekonstrýktsııalaýǵa keńinen qatysýyn qamtıtyn jańa jataqhanalar salý boıynsha memlekettik-jekeshelik áriptestik (MJÁ) tetigi ázirlendi.
2025 jyly jetim balalar men ata-anasynyń qamqorlyǵynsyz qalǵan balalarǵa, sondaı-aq kámeletke tolǵanǵa deıin ata-anasynan aıyrylǵan nemese qamqorlyǵynsyz qalǵan jastarǵa jáne 1 jáne 2-toptaǵy múgedek adamdarǵa, bala kezinen múgedek adamdarǵa, múgedek balalarǵa oqý kezeńinde JOO jataqhanalarynda turǵany úshin 100 050 teńge mólsherinde ótemaqy tóleý jalǵastyrylady.
Bıyl stýdentterdiń stıpendııasy 2 ese kóbeıetinin jazǵan bolatynbyz.