Stýdentterdiń jataqhana máselesin sheshýge arnalǵan biryńǵaı jeli qosyldy
ASTANA. KAZINFORM — Bıyl 10 576 oryndyq 27 jataqhana paıdalanýǵa beriledi. Bul týraly Úkimet otyrysynda Ǵylym jáne joǵary bilim mınıstri Saıasat Nurbek málim etti.
«Stýdentter úshin oqý jylynyń basynda mańyzdy máselelerdiń biri – jataqhana máselesi. Qazirgi kezde Almaty men Astana qalalarynda jataqhana boıynsha qıyndyq bar. Bul maqsatta jataqhanalar salýǵa arnalǵan memlekettik tapsyrys mehanızmi ońtaılandyryldy», - dedi S.Nurbek.
Sonymen qatar mınıstrlik baǵdarlamalyq memlekettik jáne jekeshelik seriktestik engizý baǵytynda jumys atqaryp jatyr. Jeke ınvestorlardy tartý mehanızmi (30% memleketten jáne 70% ınvestordan) joǵary oqý oryndarynyń ınfraqurylymyn nyǵaıtýǵa baǵyttalǵan.
«Jalpy, 2024 jylǵa 10 576 oryndyq 27 jataqhanany tapsyrý josparlanǵan (onyń ishinde JOO stýdentteri úshin 8 473 oryndyq 19 jataqhana, kolledj stýdentterine 2 103 oryndyq 8 jataqhana)», - dedi mınıstr.
Vedomstvo málimetine qaraǵanda, qazirgi kezde 2369 oryndyq 10 jataqhana iske qosyldy (Túrkistan oblysynda 70 oryndyq 1 jataqhana, Jambyl oblysynda 100 oryndyq 1 jataqhana, Atyraý oblysynda 490 oryndyq 1 jataqhana, Pavlodar oblysynda 189 oryndyq 1 jataqhana, Almaty qalasynda 490 oryndyq 2 jataqhana, Shymkent qalasynda 930 oryndyq 3 jataqhana).
S.Nurbektiń sózine qaraǵanda, stýdentterdiń oqý jylynyń basynda kóptep kelýin eskere otyryp, mınıstrlik biryńǵaı koll-ortalyq jáne ahýal ortalyǵyn uıymdastyrdy. Sondaı-aq, stýdentterdi jataqhanalarǵa ornalastyrý kúnderinde árbir joǵary oqý ornynda kómekke muqtaj stýdentti qoldaý úshin tıisti ortalyqtar jumys isteıtin bolady.
«Qazirdiń ózinde bul jelige telefon shalýǵa bolady. Kez kelgen stýdent bul nómirlerge habarlasyp, jataqhanaǵa qatysty tolyq aqparat alady. Eshkimdi dalada qaldyrmaımyz», - dedi mınıstr Kazinform tilshisine bergen suhbatynda.
Budan buryn habarlanǵandaı, búgin Úkimet otyrysynda Premer-Mınıstr Oljas Bektenov qalaǵa kelgen birde-bir stýdent baspanasyz qalmaýy tıis ekenin tapsyrdy.
