Stýdentterdiń jataqhana máselesi qalaı sheshilip jatyr
ASTANA. KAZINFORM – Jataqhana boıynsha másele Almaty qalasynda bar. Bul týraly Úkimet otyrysynda Ǵylym jáne joǵary bilim mınıstri Saıasat Nurbek málim etti.
- 2024 jyldan bastap jataqhanadan oryn berý qyzmeti proaktıvti formatqa kóshirildi. «Smart Data Ukimet» pen Joǵary bilim berýdiń biryńǵaı platformasy ıntegratsııalandy. Endi stýdenttiń qajettiligi avtomatty túrde anyqtalady. Skorıng júrgiziledi, muqtaj stýdentterdiń tizimi qalyptastyrylady, ótinim avtomatty túrde jasalady jáne sheshim qabyldanǵannan keıin stýdentke habarlama jiberiledi. 2025 jyly osy júıe arqyly 48 282 proaktıvti qyzmet kórsetildi. Sonymen qatar bul júıe ákimshilik júktemeni azaıtady, adamı faktordy jáne sybaılas jemqorlyq táýekelderin tómendetedi, - dedi S. Nurbek.
Sonymen qatar ol stýdentterdi áleýmettik qamtamasyz etý máselesine toqtaldy.
- Jalpy, respýblıka boıynsha jataqhana tapshylyǵy joq. Negizgi másele Almaty qalasynda qalyp otyr. Munda tapshylyq 5 176 oryndy quraıdy. 2026 jyly 18 jataqhanany (jalpy 6 857 orynmen) iske qosý josparlanǵan. Jańa jataqhanalar jastardyń suranysyna saı, jaıly formatta jasaqtalyp jatyr. Mysaly, Astana qalasynda Qazaq ulttyq sport ýnıversıtetinde jańa 2 jataqhana 1,5 myńnan astam stýdentti ornalastyrýǵa daıyn. Ashylýy osy aptada bolady. Almaty qalasynda Halyqaralyq bilim korporatsııasynyń 339 oryndyq zamanýı jataqhanasy bıyl qoldanysqa berildi. Qazir 7 jataqhanany iske qosý jumystary júrip jatyr. Jyl sońyna deıin taǵy 11 jataqhana iske qosylady. Oqý jylynyń basynda stýdentterden túsetin ótinishterdiń negizgi bóligi jataqhanaǵa ornalastyrý máselelerine baılanysty. Osyǵan sebepti Almaty qalasynda Ahýaldyq jáne Daǵdarys ortalyqtarynyń jumysy uıymdastyryldy, - dedi mınıstr.
Onyń sózine qaraǵanda, Ahýaldyq ortalyq Qazaq ulttyq qyzdar pedagogıkalyq ýnıversıtetiniń bazasynda jumys isteıdi. Munda stýdentter men ata-analarǵa jataqhanaǵa ornalasý tártibi, qajetti qujattar jáne ótinish berý máseleleri boıynsha naqty aqparat beriledi. Ortalyqta 8 maman jumys isteıdi. Byltyr bul ortalyqta 3 myńnan astam stýdentke kómek kórsetildi. Barlyq joǵary oqý oryndarynda da stýdentterge jedel kómek kórsetý úshin ahýaldyq ortalyqtar men jobalyq keńseler uıymdastyrylǵan.
- Almatyda naqty turǵyn úı máselesi týyndaǵan jaǵdaıda, stýdentti ýaqytsha ornalastyrý úshin Daǵdarys ortalyǵy jumys isteıdi. Ortalyq ALT University bazasynda uıymdastyryldy. Munda 50 oryn qarastyrylǵan. Byltyr daǵdarys ortalyǵynda 55 stýdent ýaqytsha ornalasyp, turaqty jataqhanaǵa aýystyryldy. Sonymen qatar barlyq óńirlerde stýdenttik ombýdsmender jumys isteıdi. Olardyń mindeti – oqý protsesi, jataqhana, áleýmettik máseleler boıynsha stýdentterdiń problemalaryn jedel qaraýǵa yqpal etý, - dedi vedomstvo basshysy.
Buǵan deıin habarlanǵandaı, bıyl stýdentter sany 740 myńnan asady.
