Stýdentterdiń memlekettik stıpendııasyn tóleýdiń jańa tártibi bekitildi
ASTANA. KAZINFORM — 2026 jylǵy 31 shildede Úkimet memlekettik stıpendııalardy taǵaıyndaý, tóleý jáne olardyń mólsherine qatysty qaǵıdalarǵa ózgerister engizdi.
Jańa tártipke sáıkes, memlekettik stıpendııa tóleý barysynda operator men joǵary jáne joǵary oqý ornynan keıingi bilim berý uıymdary «Joǵary bilimniń biryńǵaı platformasy» tsıfrlyq júıesi arqyly jumys isteıdi.
Joǵary oqý oryndary operatorǵa bilim alýshylar týraly málimetterdi, aralyq attestattaý (emtıhan sessııasy) nátıjelerin, stıpendııa alýshynyń sanatyn jáne ekinshi deńgeıli banktegi nemese Ulttyq poshta operatory arqyly ashylǵan aǵymdaǵy shotynyń derekterin ár aıdyń 12-sinen keshiktirmeı jiberýi tıis.
Eger aıdyń 12-si demalys kúnine sáıkes kelse, qujat tapsyrý merzimi odan keıingi alǵashqy jumys kúnine aýystyrylady.
Operator joǵary oqý oryndarynan kelip túsken málimetterdi bes jumys kúni ishinde qarap, ǵylym jáne joǵary bilim salasyndaǵy ýákiletti organǵa jáne tıisti salanyń ózge de ýákiletti organdaryna qarjylandyrýǵa ótinim jiberedi.
Óz kezeginde, ýákiletti organdar ótinim túsken kúnnen bastap úsh jumys kúni ishinde stıpendııa alýshylardyń talaptarǵa sáıkestigin tekserip, tólem jasaý úshin qarajatty operatorǵa aýdarady.
«Joǵary bilimniń biryńǵaı platformasy» engiziletin málimetterdiń durystyǵy men tolyqtyǵyna joǵary jáne joǵary oqý ornynan keıingi bilim berý uıymdary jaýap beredi.
Eger oqý ornynyń qate málimet usynýy saldarynan memlekettik stıpendııa artyq nemese negizsiz aýdarylsa, oqý orny stıpendııa alýshynyń artyq tólengen qarajatty operatorǵa qaıtarýyn qamtamasyz etýge mindetti.
Sonymen qatar «Joǵary bilimniń biryńǵaı platformasy» úzdiksiz jumys isteýi men ondaǵy stıpendııa alýshylar týraly derekterdiń saqtalýyna ǵylym jáne joǵary bilim salasyndaǵy ýákiletti organ jaýapty bolady.
Memlekettik stıpendııa tóleýge qajetti qarajattyń operatorǵa ýaqtyly aýdarylýyn ǵylym jáne joǵary bilim salasyndaǵy ýákiletti organ men tıisti salalardyń ózge de ýákiletti organdary qamtamasyz etedi. Al stıpendııa qarajatyn bilim alýshylardyń banktik shotyna ýaqytyly aýdarý jáne tólemderdi júzege asyrý mindeti operatorǵa júktelgen.
Budan bólek, qaýlyda aı saıynǵy memlekettik stıpendııa mólsherleri de jańartyldy.
Qaýlyda 2024 jylǵy 1 qyrkúıekten jáne 2025 jylǵy 1 qyrkúıekten bastap belgilengen memlekettik stıpendııa mólsherleri kórsetilgen:
— jumysshy biliktiligi boıynsha tehnıkalyq jáne kásiptik bilim alatyn stýdentterdiń memlekettik stıpendııasy — 43 574 teńge, al orta býyn mamandaryn daıarlaıtyn tehnıkalyq, kásiptik jáne orta bilimnen keıingi bilim berý uıymdary stýdentterine — 41 896 teńge;
— joǵary oqý oryndarynyń pedagogıkalyq emes jáne «Densaýlyq saqtaý» baǵytyna jatpaıtyn mamandyqtarynda oqıtyn stýdentter 52 372 teńge;
— pedagogıkalyq jáne «Densaýlyq saqtaý» baǵytyndaǵy stýdentterdiń aı saıynǵy memlekettik stıpendııasy 84 myń teńge;
— ınternderge 94 862 teńge;
— magıstranttardyń memlekettik stıpendııasy 117 098 teńgege deıin ósedi. Al «Nazarbaev Ýnıversıtetinde» bilim alyp jatqan magıstranttar aı saıyn 218 750 teńge;
— «Densaýlyq saqtaý» baǵyty boıynsha bilim alatyn rezıdent-dárigerler men magıstranttarǵa 134 664 teńge, al doktoranttarǵa, onyń ishinde osy baǵyttaǵy PhD doktoranttaryna 262 500 teńge;
-joǵary jáne joǵary oqý ornynan keıingi bilim berý uıymdarynyń daıyndyq bólimderinde oqıtyn tyńdaýshylarǵa stýdentterdiń memlekettik stıpendııasynyń 85 paıyzy kóleminde, ıaǵnı 40 065 tenge/44 516 teńge beriledi.
Qaýly 2026 jylǵy 15 tamyzdan bastap kúshine enedi.
Eske salaıyq, buǵan deıin mektepterdegi kanıkýl men emtıhan kestesi bekitilgeni habarlanǵan edi.
