Stýdentterdiń 85 paıyzy jataqhanamen qamtylǵan
ASTANA. KAZINFORM –Elimizde stýdentterdiń 85 paıyzy jataqhanamen qamtylǵan. Bul týraly Mádenıet jáne aqparat vıtse-mınıstri Evgenıı Kochetov Halyqaralyq jastar kúnine arnalǵan brıfıngte málimdedi.
Vıtse-mınıstrdiń aıtýynsha, keıingi jyldary stýdentterdi jataqhanamen qamtamasyz etý máselesi kezeń-kezeńimen sheshilip keledi.
– Qazirgi tańda 250-den astam stýdenttik jataqhananyń paıdalanýǵa berilýi oryn tapshylyǵyn alty ese qysqartýǵa múmkindik berdi. Osylaısha, búgingi kúni stýdentterdiń 85 paıyzy jataqhanamen qamtylyp otyr. Aldaǵy ýaqytta oryn tapshylyǵyn tolyq joıý kózdelgen, - dedi Evgenıı Kochetov.
Sonymen qatar ol keıingi jyldary bilim men ǵylymǵa bólinetin ınvestıtsııa kólemi bes ese, al bilim berý júıesiniń bıýdjeti úsh ese óskenin atap ótti. Stýdentterdiń shákirtaqysy eki ese ulǵaıyp, bilim granttarynyń sany 1,5 ese artqan.
Budan bólek, jastardyń bilim berý salasyndaǵy suranysyna da nazar aýdaryldy.
Spıkerdiń sózinshe, zertteý nátıjesine sáıkes, jastardyń 62,9 paıyzy bilim berý júıesinde jasandy ıntellekt tehnologııalaryn meńgerýdi mańyzdy dep sanaıdy.
– Osy baǵytta tsıfrlyq bilim berý baǵdarlamalary damytylyp, jasandy ıntellekt salasynda Alem AI halyqaralyq ortalyǵy men zertteý ýnıversıtetin qurý jumystary júrgizilip jatyr. Sondaı-aq «Bolashaq» baǵdarlamasynda ınjenerlik, IT, medıtsına jáne jaratylystaný ǵylymdary baǵytyndaǵy mamandyqtarǵa basymdyq berilip otyr, - dedi vıtse-mınıstr.
Aıta keteıik, buǵan deıin Almatyda jańa oqý jyly qarsańynda stýdentterdi jataqhanamen qamtamasyz etý jónindegi Ahýaldyq ortalyq jumysyn bastaǵany habarlandy.
