Stýdentterdiń jemqorlyqqa qarsy chellendji jalǵasýda - ShQTÝ

ÓSKEMEN. QazAqparat - Jaqynda Shoqan Ýálıhanov atyndaǵy Kókshetaý ýnıversıtetinde «AntiParaCraft – 2021» stýdenttik jemqorlyqqa qarsy kvest ótkizilip, chellendj jarııalanǵan bolatyn. Osyǵan oraı, D. Serikbaev atyndaǵy Shyǵys Qazaqstan Tehnıkalyq ýnıversıtetiniń stýdentteri jemqorlyqqa qarsy kvest uıymdastyrdy. Bul is-shara joǵary oqý ornynyń stýdentteri arasynda parasattylyqty, sybaılas jemqorlyqqa qarsy mádenıetti qalyptastyrýǵa baǵyttalǵan.

QR Sybaılas jemqorlyqqa qarsy is-qımyl agenttiginiń ShQO boıynsha departamenti, Preventsııa jáne parasattylyq basqarmasynyń basshysy Arhat Beısembaev, «Shyǵys — Adaldyq alańy» jobalyq keńsesiniń jetekshisi, Shyǵys Qazaqstan oblystyq máslıhaty depýtaty Marjan Baqyt kvest oıynǵa qatysýshylarǵa sáttilik tiledi.

Al ShQTÝ birinshi prorektory, Ádep jáne sybaılas jemqorlyqqa qarsy is-qımyl jónindegi ýákil, Sáýle Rahmetýllına atalmysh qadamnyń mańyzdy ekenin atap ótedi. «Ýnıversıtetimizde «Halyqaralyq ISO standarttary boıynsha sybaılas jemqorlyqqa qarsy menedjment júıesi» engizilýde. ISO 37001: 2016 halyqaralyq standarty sybaılas jemqorlyq táýekelderin baǵalaý, ISO standartynyń qurylymyna taldaý jasaý, ýnıversıtette sybaılas jemqorlyqqa qarsy menedjment júıesin engizý jáne jetildirý, júıeni jáne onyń protsesteri men elementterin jobalaýǵa qoıylatyn talaptardy kúsheıtedi. Bizdiń ýnıversıtettiń qabyrǵasynda jemqorlyqqa jol bermeýge «Adaldyq kapıtandary» óz úlesterin qospaq. Bul sharanyń basty ereksheligi stýdentter arasynda krıtıkalyq oılaý sheberligin damytý, óz oıyn aıqyn jetildire bilýleri baǵalanady. Bul jastardy sybaılas jemqorlyqqa qarsy kúresýge baǵyttalǵan biregeı joba. Jemqorlyqqa qarsy kvest oıyn ótkizý ýnıvesrıtettiń jyl saıynǵy dástúrine aınalmaq», - deıdi ol.

Aıta keterligi, stýdentter de bundaı sharanyń ıgiligin túsinip, qyzyqty, tartymdylyǵyn erekshe atap ótedi. Bundaı sharanyń jalǵasyn tabatynyna da senim bildiredi.