Stýdentterdiń kásiporyndarda mindetti óndiristik praktıkadan ótýi zań júzinde bekitiledi
Osyndaı normany qarastyryp otyrǵan "QR keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly" QR zańynyń jobasy búgin QR Parlamenti Májilisiniń birinshi oqylymynda maquldandy.
Zań jobasy bilim berý júıesin jetildirýge baǵyttalǵan.
"Memleket basshysynyń tapsyrmasy boıynsha oqýdyń ekinshi kýrsynan bastap, stýdentterdiń kásiporyndarda mindetti óndiristik praktıkadan ótýi zań júzinde bekitiledi. Bul jumys berýshilerdiń praktıkadan ótý úshin jumys oryndaryn usyný mindettemesin belgileıdi, salalyq memlekettik organdardyń, ulttyq kompanııalardyń, kásiporyndardyń kadrlar daıarlaýdaǵy jaýapkershiligin arttyrady", - delingen zań jobasynyń qorytyndysynda.
Baıandamashy QR Bilim jáne ǵylym mınıstri Aslan Sárinjipov atalǵan ereje jastar arasyndaǵy jumyssyzdyqty tómendetýge de múmkindik berip, olardyń jumysqa ornalasý jáne Eldiń ındýstrııalyq-ınnovatsııalyq damytý baǵdarlamasyna qatysý deńgeıin arttyrady dep esepteıdi.
Zań jobasynda "dýaldi oqytý" uǵymy bekitiledi, bul da kásiporyndarynda óndiristik oqytý men praktıkaǵa basymdyq bere otyryp, bilikti kadrlar daıarlaý kezinde jumys berýshi men oqý ornynyń jaýapkershiligin belgileýge múmkindik beredi.
Ýákiletti organnyń JOO stýdentteriniń mindetti óndiristik praktıkasyn uıymdastyrý jáne ótkizý tártibin aıqyndaý, sondaı-aq dýaldi oqytýdy uıymdastyrý jónindegi quzyretin belgileý usynylady.
Túlekterge jumysshy biliktiliginiń belgilengen jáne joǵarylatylǵan deńgeıin bere otyryp, tegin tehnıkalyq jáne kásiptik bilim berý memlekettik kepildik retinde kózdeledi. Bul jastardyń tehnıkalyq jáne kásiptik bilim alýǵa qol jetkizýin jáne onyń tartymdylyǵyn arttyrady, olardyń alǵashqy jumysshy mamandyǵyn alýyna múmkindik beredi.
Aıta keteıik, jumys toby atalmysh zań jobasynyń 400-den astam túzetýler men usynystardy qarady. Olardyń kópshiligi boıynsha kelisilgen sheshim qabyldandy. Májilistiń barlyq komıtetteri zań jobasyna oń qorytyndylaryn berdi.