Stýdentterdi jataqhanalarmen qamtamasyz etý boıynsha ahýaldyq ortalyq quryldy
Bul týraly búgin mınıstr Saıasat Nurbek joǵary oqý oryndary rektorlarynyń qatysýymen ótken keńeıtilgen alqa otyrysynda málimdedi.
Vedomstvo basshysy Saıasat Nurbek stýdentterdi barynsha jataqhanalarmen qamtamasyz etý qajettiligine erekshe nazar aýdardy.
«Barlyq stýdentterdi jataqhanalarmen qamtamasyz etý múmkin emes ekeni anyq. Bul kóp jumysty qajet etetin másele. Biraq, mınıstrlik osy baǵytta jumys júrgizip jatyr. Atap aıtqanda, bizdiń vedomstvo stýdentterge jataqhanalardan oryn alýǵa kómektesetin ahýaldyq ortalyq qurdy», - dep atap ótti mınıstr.
Sondaı-aq, Saıasat Nurbek stýdentterdiń máselelerine beı-jaı qaramaıtyn qoǵam qaıratkerleri men azamattardy ahýaldyq ortalyqtyń quramyna kirýge shaqyrdy.
Stýdentterdiń turǵyn úımen týyndaǵan problemalaryna jedel den qoıý úshin ahýaldyq ortalyqta +77002551443 nómirleri boıynsha call-ortalyq iske qosyldy, ol 24/7 jumys isteıtin bolady.
«Oryn tapshylyǵy boıynsha problemalardy júıeli sheshý úshin bıyl biz Almaty men Astanada jataqhanalar salý boıynsha jobalyq keńseler ashtyq, óıtkeni oryn tapshylyǵynyń 70% - y osy qalalarǵa tıesili. Sondaı-aq, men buǵan deıin joǵary oqý oryndarynda jóndeý jumystaryn 15 tamyzǵa deıin aıaqtaýdy tapsyrǵan edim. Oqý jyly bastalǵansha oqý oryndarynyń birinshi basshylary jataqhanalardyń sanıtarlyq jáne tehnıkalyq normalardyń talaptaryna sáıkestigine erekshe nazar aýdarýy qajet», - dedi Saıasat Nurbek.
Joǵary oqý oryndarynyń boljamy boıynsha jańa oqý jylynda jataqhanaǵa muqtaj stýdentter sany 134 myń adamdy quraıdy. Almaty qalasynda joǵary oqý oryndarynyń kóp shoǵyrlanýyna baılanysty jyl saıyn ártúrli óńirlerden kelip, ońtústik astanaǵa oqýǵa túsýshilerdiń sany kóbeıýde. Jataqhanalarda oryn jetpegen stýdentterge oryn tapshylyǵy máseleleri sheshimin tapqansha hostelder men qonaqúılerde oryn usynylady.
Aıta keteıik, 2023 jyldyń 1 qyrkúıeginen bastap «Bilim týraly» zańnyń barlyq bilim alýshylardy jataqhanalardaǵy oryndarmen qamtamasyz etýdi kózdeıtin jańa redaktsııasy kúshine enedi.
