Stýdentterdi saılaý naýqanyna qatysýǵa májbúrlegen basshy jumystan qýylýy kerek – «Aq jol» partııasy
NUR-SULTAN. QazAqparat – «Aq jol» demokratııalyq partııasy saılaýda jastardyń tańdaý erkindigin jáne adamdyq abyroıyn qorǵaýdy talap etti, dep habarlaıdy QazAqparat tilshisi.
«Saılaýaldy naýqan júrgizýde ákimshilik resýrsty qoldaný – bólek másele. JOO-lar men kolledjder ákimshiligi óz stýdentterin buqaralyq sharalarǵa qatysýǵa májbúrlese, daýys bergeni týraly esep talap etse, mundaı oqý orny basshylary kem degende jumystan qýylýy kerek. Jastarda óz tańdaýyn jasaý múmkindigi bolýy kerek. Jastar men stýdentterdiń erkindigi men jeke kózqarasyn basyp-janshý maqsatty túrde balalardy ótirik aıtýǵa jáne ózine jasalǵan zorlyqqa kónýge úıretedi. Mundaı «quldardyń» býynymen ultymyz ótirik pen ózgege baǵynyshty bolý qaýpine ushyraıdy», - dedi Azat Perýashev partııa quryltaıynda.
Spıker Qazaqstanǵa erkin, kúshti ári ózine senimdi jastar qajet ekenin basa aıtty.
«Osydan bir ǵasyr buryn Alashtyń aıaýly aqyny Maǵjan Jumabaıuly «Men jastarǵa senemin» dep jyrlaǵan bolatyn. Al biz 100 jyl ótken soń nelikten sol jastarǵa senbeımiz? Nege olardyń óz tańdaýyna kedergi jasaımyz? «Aq jol» demokratııalyq partııasy jastardyń tańdaý erkindigi men adamdyq abyroıyn qorǵaýdy talap etedi», - dedi A. Perýshev.
Aıta keteıik, «Aq jol» demokratııalyq partııasynyń XVI saılaýaldy quryltaıynda partııanyń saılaýaldy baǵdarlama jobasy usynyldy. Partııa tóraǵasy Azat Perýashev baǵdarlamadaǵy eń negizgi basymdyq – Táýelsizdik jáne Alash ulttyq ıdeıasy ekenin atap ótti.
