Stýdentterdi Prezıdent saılaýyna qatysýǵa májbúrleýge tyıym salynady – Ǵylym mınıstri

ASTANA. QazAqparat – QR Ǵylym jáne joǵary bilim mınıstri Saıasat Nurbek stýdentterdi kele jatqan Prezıdent saılaýyna qatysýǵa májbúrleý týraly suraqtarǵa jaýap berdi, dep habarlaıdy QazAqparat tilshisi.

«2019 jyly ýnıversıtet basshylyqtary stýdentterdi Prezıdent saılaýyna qatysýǵa májbúrlegeni aıtylǵan bolatyn. Odan bólek, stýdentterge aqy tólep, olardy úgit-nasıhat jumystaryna jumyldyrǵan. Bıyl mundaı áreketterge jol berile me? Stýdentter ýnıversıtet ákimshiligi tarapynan osyndaı qysymǵa ushyrasa, qaıda habarlasa alady?», - degen suraq qoıyldy mınıstrge Ortalyq kommýnıkatsııalar qyzmetinde.

«Birinshiden, biz jańa ádiletti Qazaqstandy quryp jatyrmyz. Prezıdent ondaı áreketterdi óte qatań baqylap, tyıym salady. Bizdiń mınıstrilk tarapynan uıymdastyrylǵan arnaıy áreketter bolmaıdy. Taǵy da mynandaı júıeli sheshimdi taptyq, endi mınıstrdiń janynda stýdentterdiń quqyqtaryn qorǵaıtyn arnaıy ombýdsmen bolady. Ol kóptegen stýdentterge tanymal, belsendi azamatymyz – Aısulý Ernııazova. Resmı túrde mınıstrlikte shtattyq keste bekitilmedi, kelesi aıdyń basynda bekitýdi josparlap otyrmyz, sodan keıin resmı túrde habarlaımyz. Endi kez kelgen JOO stýdenti mınıstr janyndaǵy arnaıy ókiletti ýákilge júgine alady», - dep jaýap berdi Saıasat Nurbek.

Buǵan deıin Ǵylym jáne joǵary bilim mınıstri óz balalarynyń qaıda bilim alyp jatqany týraly jýrnalıster suraǵyna jaýap bergen edi.

Sonymen birge, 2500 qazaqstandyq stýdent Reseı men Ýkraınadan otandyq JOO-larǵa aýysqan.

Odan bólek, Saıasat Nurbek stýdentterge jataqhana tapshylyǵy qalaı sheshiletinin túsindirgen edi.